Meäʹcchalltõs ääʹvii luõzz šeellmõõžž Aanar kåʹddniiʹǩǩid da Njauddâm siidâst jälsteei oummid. Ålggpäiʹǩǩ-kåʹddneeʹǩǩ jie vuäǯǯ taʹnni šeeʹlled luõzz.
Tuʹmmstõõǥǥ mieʹldd Njauddâmjooǥǥâst vuäǯǯ šeeʹlled luõzz 20.6.-31.7.2026.
Lååʹpp lij väʹldded õõut kueʹl suutkâst da õhttsa lååi kueʹl šeeʹllempââʹjest. Puk pâʹjjel 70 seeʹnt kuõʹlid âlgg lueʹštted mååust.
Čeʹvetjäuʹrrneǩ Jouko Moshnikoff rämmaš, ko peäss eʹpet jokk-kuâŋŋsest naaudšed luõzzâst.
– Kâʹl tõt miârkkaš jiânnai, ko pâi leäm toʹben juõʹǩǩ ǩieʹzz šeellam luõzz. Lij pueʹrr, ko peäss säiʹmmstõõllâd da vuäggad.
Moshnikoff laaʹvai poorrâd luõzz vueiʹvest veäpssa.
– Säʹlttkueʹll tõt pueʹrmõs lij. Siõmmna võõrâs luukk tõõzz ool.
Nuõrab kueʹllšiiʹlli Emma Krupula laaʹvai še säiʹmmstõõllâd juõʹǩǩ ǩieʹzz. Suʹnne lij vääžnai, što päiʹǩǩ-kåʹddneeʹǩǩ vuäǯǯa porrmõõžžâz ââlda.
– Lij aivv vuõiʹǧǧest, što šeellmõõžž rääʹjtet vuõššân jeärrsin da turiismâst ko pääiklain di säʹmmlain. Ǩieʹss lij ââʹn peälštum, håʹt-i jie tõk luõssnääʹl vaiggâdvuõđ leäkku jaukkâm toʹben, särnn Krupula.
Nuõrid šeellmõš da jeeʹres äʹrbbvuõđla jieʹllemvueʹjj lie mäinn jälsted Njauddmest da Čeʹvetjääuʹrest.
– Luõss-šeellmõš lij muu ǩieʹzz vääžnmõs podd. Leäi kâʹl huõll, što piâssâp-a ni vooʹps šeeʹlled. Jõs luõzz ij piâzzče šeeʹlled leʹbe puõccuid hoiʹddjed, jiõm haaʹleʹče jälsted tääiʹben, son särnn.
Saaʹmi ouddooumaž Veikko Feodoroff lij ǩeâđđa vuässõõttâm Njauddâmjooǥǥ šeellmõõžž saǥstõõllmid.
Son lij tååđvaž tõõzz, mäʹhtt taʹnni pääikla leʹjje mieʹldd.
– Ââʹn lij šiõǥǥ toobd, što pääikla vuäǯǯa šeeʹlled, ko leäʹp tõʹst kuuʹǩǩ saǥstõõllâm. Saaʹmi vuõiggâdvuõđ lie še tän tuʹmmstõõǥǥ tueʹǩǩen, mušttal Feodoroff.
– Tät lij aaibâs tääʹrǩes äʹšš mij siid oummid, što peäʹsse jiijjâz kulttuur mieʹldd šeeʹlled nuʹtt, mâʹte meeʹst lij leämmaž tät nääʹll. Lij vääžnai, što tõt ij puåtkkân.
