Go báhppa ovdamearkka dihte gásttaša máná, sus lea veahkkin girkolaš doaimmahusaid girji, gos lea minsttar dahje málle mo dan galgá čađahit.
Dál dan girjái áigot oažžut maiddái báikkiid buressivdnideami. Dasa lea sápmelaččaide dárbu, dadjá girku sámebarggu čálli Erva Niittyvuopio. Ášši gieđahalle girku sámebarggu ráđđádallangotti čoahkkimis.
– Máŋgii dat boahtá dan oktavuođas, ahte lea vaikko huksejuvvon dakkár boares máđijaid ala ja dat báiki lea ráfeheapme. Dahje go lea dieđus, ahte báikkis lea dolin dáhpáhuvvan juoga, iige dat dološ áigi leat ožžon ráfi, ja dan dihte dat hehtte maiddái dan otná beaivvi ássi, čilge Niittyvuopio.
Niittyvuopio lea ieš fitnan máŋgii buressivdnideamen muhtun báikkiid. Son diehtá man duođalaš dat lea dan olbmui, guhte dan dáhttu.
– Olbmot bovdejit buressivdnidit dan báikki ja addit ráfi sidjiide geat leat eallán, dahje johtán dakko, ja maiddái ráfi daid otná beaivve ássiide.
Girku giehtagirjjis lea minsttar ruovttu buressivdnideapmái. Niittyvuopio jáhkká báikki buressivdnideami čuvodit dan málle ja das váldojuvvo kultuvrralaš iešvuohta vuhtii.
– Dat lea hirbmat dehálaš, ahte otná beaivve girku dohkkeha, ahte mis sápmelaččain leat maiddái dákkár gažaldagat ja daid ferte duođas váldit.
Sámebáhpas bivdán ovdamearkka dihte iešsorbmema maŋŋá buressivdnideami ruktui
Dán áigge olbmuin lea dárbu sierralágan rohkosbottuide, muitala sámebáhppa Mari Valjakka.
– Ovdamearkka dihte leamašan sáhka, ahte galggašiigo vaikko baby showeriid (doalut, gos ávvudit boahttevaš eatni ja máná) oktavuođas leat rohkosboddu dahje juoga.
Dárbu girkolaš doaimmahusaid girjji ođasteapmái lea, alimus ilu bottuid lassin losimus morraša áigái.
– Dáppe Sámis lean ieš fuomášan, ahte ovdamearkka dihte jus lea muhtun dálus leamašan iešsorbmen, dan maŋŋá olbmot jerret, ahte sáhtášitgo buressivdnidit min ruovttu.
Valjakka muitala, ahte Norgga girku lea jo ovdamearkka dihte hárjánan dasa, ahte váttis dilálašvuođain sáhttet buressivdnidit báikki.
Oulu bismágotti bismá Jukka Keskitalo jáhkká, ahte suopmelaččain ja sápmelaččain lea eará lágan jurddašeapmi báikkiin, ja eandaliige sámekultuvrra oktavuođas báikkiid buressivdnideapmái lea dárbu.
– Luondu lea ovdamearkka dihte hui guovddážis sápmelaččaid vuoiŋŋalašvuođa. Dieđusge dáppe leat earenomáš dáhpáhusat ja báikkit, maid olbmot juoga nu láhkai hálidivčče vuoiŋŋalaččat vuhtiiváldit, smiehtada Keskitalo.
