Suomas servviid doaimmat soitet gáržut ain čuovvovaš jagiid, čájeha gaskavahku almmustuvvan ráđđehusa bušeahttaplánat.
Sosiála- ja dearvvasvuođasuorggi servviide dárkkuhuvvon STEA ruđain áigot čuohppat boahtte jagi 85 miljovnna euro, mii lea sullii goalmmádas dálá ruhtasupmis.
Dán jagi STEA-ruđaid leat juolludan servviide 274 miljovnna euro. Dál stáhta árvala, ahte boahtte jagi STEA-ruđat livčče juogus dušše 190 miljovnna euro.
SámiSoster-searvái dát STEA ruđaid geahpedeapmi čuohcá sakka, oaivvilda searvvi doaimmajođiheaddji Ristenrauna Magga. Searvi lea gártan moatti jagi áigge geahpedit bargiid ja dat váikkuha njuolgga doaimmaide.
Suoma stáhta čavga ruhtadilli ii lohpit boahttevuođasge buoret dili.
Magga oaidná, ahte ovddit jahki leamašan dán rádjai dat vearrámus.
– Ruhtadeaddji almmuhii, ahte go mis lea dat boarráset olbmuide oaivvilduvvon Birgen ruovttus -doaibma, ahte das galgá seastit. Dál leat dušše golbma bargi. Guokte bargi šattaimet geahpedit ja hálddahusa bealde ovtta bargi, lohká Magga.
Searvvi ruhtadeami geahpededje jagis 2024 badjel 100 000 euroin, go STEA nappo Sosiála- ja dearvvasvuođasuorggi searvvi veahkkeguovddážis čuhppe 80 miljon euro. Searvi lea Suoma Sámi áidna sosiála- ja dearvvašvuođasuorggi organisašuvnna.
Ruhtadeami ferte skáhppot máŋgga sajis
SámiSoster -searvi fidne stuorra oasi ruhtadeamistis STEA-doarjagiin.
Seasttut dieđus dárkkuhit searvái dan, ahte ferte čállit eanet ruhtaohcamušaid.
– Ferte ohcat eará ruhtadangálduid. Ja dat lea dieđus odná beaivve ja mis lei gaskavahku stivrračoahkkin ja dan birra mis lei dalle sáhka, muitala Magga.
Sosiála- ja dearvvasvuođasuorggi searvvit sáhttet ohcat ruhtadeami eanet buresveadjinguovlluin.
