Dál lea Suoma Sámedikki ođđa nuoraidráđđi čoahkis. Vuohččulaš Sárá-Márjá Keskitalo válljejuvvui dál jođihit nuoraidráđi.
Keskitalo searvvai guokte jagi dassái nuoraidráđi doaimmaide.
– Dat leamaš hirbmat miellagiddevaš ja lean beassan oahppat olu áššiid. Dalle go álggahin, in gal diehtán nu olu maid nuoraidráđđi bargá muhto lea beassan olu oahppat ja iešguđetlágan dilálašvuođaide searvat mielde, muitala Keskitalo.
Dál Keskitalo orru vel moadde mánotbaji Austrálias, gos son lea universitehta lonohallanstudeantan. Mannan geasi rájes son lea ássan Hobart-gávpogis ja studere Tasmania universitehtas politihka diehtagiid.
Geassit son máhccá fas ruoktot. De lea áigi bargagoahtit eanet ovttas nuoraidráđiin.
Nuoraidráđđi bargá dán doaibmabajis erenomážit sámegielat nuoraidbarggu ovddideami ovdii ovttas De!2-prošeavtta bargiiguin.
– Doaibmaplánas mis leat váldotemán sámegielat ja dat mo kultuvrra váldit vuhtii nuoraid asttoáiggebarggus Sámis, muitala Keskitalo.
Sámi eallinbirrasa ovddideapmi nuoraid váras ain áigeguovdil
Várás dieđuid mielde Suomas nuorat leat dál eanet duhtameahttumat iežaset eallimii go goassige ovdal.
Sárá-Márja Keskitalo lea čuvvon ođđasiid nuoraid dálá eallimis váivves mielain.
– Go ieš studere politihka diehtagiid ja oalle olu máilmmi politihkage ferte čuovvut, de iihan dat álo nu čuovgat oro ođđasiin. Ođđasiin eai leat olu positiivvalaš áššit.
Danin nuoraidráđisge háliidit ovddidit sámenuoraid eallima davvin. Nuoraide heivvolaš eallinbirrasis ja vejolašvuođain bargo- ja ealáhuseallimis lea ain dehálaš ášši, masa nuoraidráđđi bidjá návccaid.
– Livččii dehálaš, ahte Sámis nuoraid eallinbiras livččii dakkár, ahte nuorat sáhttet báhcit Sápmái ja boahtit ruovttoluotta. Dat ášši lea máŋggaid jagiid leamašan badjin, jurddaša Keskitalo.
Keskitalo vulggii lohkat politihka danin, go su mielas dat lea miellagiddevaš. Das son oaidná leat olu ávki, go jođiha nuoraidráđi.
– Mu mielas lea dehálaš, ahte nuorat besset oahppat politihkas ja muđuige servodaga eallimis, dadjá Keskitalo.
Vel son ii goit niegat Sámedikki ságadoalli rollas, vaikko leage aktiivvalaš nuoraidráđi doaibmi.
– Dál mun háliidan studeret ráfis lohppii, bohkosa son.
