Anára čuoiganstadiovnnas lea hušša go dán vahkkoloahpa suopmelaš čuoigit gilvvohallet čuoigama Suoma meašttirvuođas. Anára Juvduvári láhtuid dovdet das, ahte stuorra allodatearuid dihte dat lea erenomáš hástaleaddji maiddái ámmátčuoigiide.
Daidda láhtuide loahpaheaba guokte Suoma čuoiginástti iežaska gilvočuoigama. Krista Pärmäkoski lea okta buoremusat birgen suopmelaš čuoigi 2000-logus. Dál son vuolgá maŋimus čuoigangilvvuide vuordevaš muhto maid morašlaš mielain.
– Oron muitimin, ahte dáppe leat oalle lossa láhtut de várra gilvvu áigge in ahkiduša nu sákka, boagusta Pärmäkoski.
Perttu Hyvärinen maid lea guhká leamašan Suoma dovdosamos čuoigiin ja ovddastan Suoma riikkajoavkku riikkaidgaskasaš árvogilvvuin. Dál susge lea áigi álgit juoidá eará bargat.
– Dás joatkán fitnodatdoaimmain ja čakčat joatkán meahccediehtagiid oahpuid universitehtas. Dás leat olu rabas uvssat, muhto leahan dat somá, go beasan vuosttas geasselupmuige. Lea fiinna ja guhkes karrieara leamašan ja dál lea áigi heaitit, muitala Hyvärinen.
Pärmäkoski boahtit liikká oaidnit ain čuoiganmáilmmis - Pärmäkoski álgá čuoigi Tiia Olkkonena ođđa hárjeheaddjin. Sabehiid son ii áiggo loktet áitái.
– Dat lea goittotge leamašan mu mielamiel astoáiggedoaibma, de máhcat dan buđaldeapmái fas.
Čuoiganbaji loahppa vuhtto gilvoforpmas
Anára SM-gilvvut álget leat gilvočuoiganbaji maŋimuš árvogilvvut Suomas.
Krista Pärmäkoski vuittii bronssa SM-gilvvuin Anáris jagis 2023. Daidda gilvvuide sus eai leat dađe gummát vuordámušat.
– Gullen ahte earátge leat nu gohčoduvvon giđđaforpmas, de dat lea vehá árvideames mo dát gilvvut mannet. Sáhttá vuolgit bures dahje de ii mana áibba nu, mo dálvit alimus bajis leat hárjánan, dadjá Pärmäkoski.
Perttu Hyvärinen maid árvala, ahte ferte nagodit bossumiin vuoigŋat iežas daid milliid bajás. Son lea lávvardaga fárus sáttačuoigamis iežas joavkkuin.
– Ferte maid dadjat, ahte dán muttus gilvobaji, dáppe leat goasii beare garra láhtut. Dán muttus reahkkáše vehá geahppasut láhtutge. Gal šaddet čavga gilvvut, árvala son.
Gilvvuid ordnejit eaktodáhtolaš bargofámuin
Čuoigangilvvuid ordnen gáibida olu eaktodáhtolaš barggu ja badjel 200 eaktodáhtolaš bargi leatge bargan gilvvuid ovdii máŋga jagi. Gilvvuid lágida báikkálaš valáštallansearvi Inarin yritys.
– Mun lean hui luohttevaš mielain go birra Suoma deike leat čoahkkanan olbmot, geat máhttet dan hommá. Dat lea dehálaš. Sii leat dál dáppe ja gilvvuid bidjet johtui, dadjá valáštallan ráđđeolmmoš Kari Kyrö.
Lágideddjiin leage vel varas muittus mo SM-gilvvuid galgá lágidit, go maŋimustá jagi 2023 gilvvuid čađahedje Anáris.
– Gal dat lea álkit go lea ovdalge lágidan. Ja buot ráhkkanusat, áiddit ja fuolahanvisttážat ledje vuorkkás, árvala Kyrö.
