Sámi Grand Prix gilvu lágiiduvvui lávvardaga njukčamánu 28. beaivve Guovdageainnus Báktehárjjis.
Gilvui oassálaste 12 bihtá, muhto dušše guovttis sáhtte vuoitit. Sámi Grand Prix lávlunoasi vuittii Ellinor Halvari bihttáin Du Dušši. Son lei nuppi geardde Sámi Grand Prixas fárus. Vuosttas geardde jagis 2022 bođii son joavkkuinis SOÁ nubbin. Halvari jáhkká dán jagi sus vuhttui, ahte son lea duođas artistabarggu bargamen. Son lea ilus vuoittus.
– Mun in álggos ádden, ahte mun ledjen vuoitán. Go mun de áddejin, ahte mun dan gusto vuiten, de lei jáhkkemeahtun dovdu.
Gilvvu árbevirolaš luođi oasi vuittii Ánte Niillas Bongo Nášša álddut luđiin. Bongo jáhkká maiddái bohccot dovde ja illudedje go son juoiggastii. Dát lei sutnje nubbi Sámi Grand Prix juoiganoasi vuoitu. Váikko ii lean vuosttas vuoitu, de illuda dattetge.
– Gal dat lea erenomáš vuoitit Sámi Grand Prixa. Árbevirolaš luohti lea hui divrras munje ja háliidan dat galgá seailut, lohká Bongo.
Áillohaš bálkkašupmi rap-artisttaide
Sámi Grand Prix olis juhkkojuvvui árbevirolaš Áillohaš-bálkkašupmi. Dán jagi Áillohaš-bálkkašumi oaččuiga Ailu Valle ja Mikkal Morottaja, artistanamain Amoc.
Áillohaš bálkkašumi vuođustusain muitalit, ahte Valle ja Morottaja leaba leamašan álggu rájes hábmemin sámi rap- ja hiphop šáŋrra. Goappašagat leaba lokten oidnosii giela, servvodaga, politihka ja luonddu iežaska teavsttaiguin. Ná leaba viiddidan sámi musihka musihkašládjan, mas lea otná áigásaš poesiija.
Soai čálliba anáraš- ja davvisámegillii ja nu čalmmustahttiba mo giela sáhttá geavahit. Dainna soai leaba rahpan uvssaid nuorat olbmuide ja ožžon ođđa buolvvaid árvvusatnit giela oahppama.
Áillohaš bálkkašupmi lea 40 000 Norgga kruvnnu, guokte vahku orru Áillohačča ruovttus Lassagámmis ja Nils-Johan Labba duddjon guksi ja niibi.
Áillohaš musihkkabálkkašupmi juhkkojuvvo artistii, juoigái, musihkkárii, jovkui dahje earái gii lea bargan luođi ja sámi musihka buorrin Áillohačča vuoiŋŋas. Bálkkašupmi juhkkojuvvui vuosttas geardde jagis 1993, dalle dan oaččui Mari Boine. Dat juhkkojuvvo jahkásaččat Sámi Grand Prix oktavuođas.
Sámi Grand Prix beasat geahččat maŋŋelgihtii Yle Areenas.
Rievdaduvvon 28.3. dii. 23.29: Lasihuvvon Ellinor Halvari ja Ánte Niillas Bongo kommeantat.
Divvojuvvon 31.3. dii 9.28: Divvojuvvon Ánte Niillas Bongo luođi namman Nášša álddut iige Nášša Álddožiid nu mo alggos čáliimet.
