Sámemusihka stuorámus dáhpáhus Sámi Grand Prix lágiduvvo dán jagi jo 36. geardde. Yle, SVT ja NRK oktasaččat lágiduvvon njuolggosáddaga beassá čuovvut njukčamánu 28. beaivve Yle Areenas ja Yle Teemas diibmu 20.45 ovddosguvlui.
Njuolggosáddaga Guovdageainnu Báktehárji-árenas láidesteaba Ánte Siri ja Isalill Kolpus. Sáddaga láidesta suomagillii Xia Torikka.
– Sámi Grand Prix lea min UMK, min Eurovišuvdna. Vaikko sámegiela ii máhtášiige, de musihkka lea universála gulahallanvuohki, mii rahpá sámekultuvrra áibbas iežas láhkai buohkaide, muitala Torikka.
Sámi Grand Prixas lávddi ala lávkejit 12 artistta dahje joavkku, geat gilvvohallet guovtte kategoriijas: árbevirolaš luođis ja modeardna musihkas. Vuoitiid válljejit duopmárat ja álbmot. Dán jagi sihke Suomas, Ruoŧas ja Norggas jienastit Melodifestivála applikašuvnna bokte.
– Yle lea nanosmahttán sámegielat sisdoaluid ja davviriikkalaš ovttasbarggu. Sámi Grand Prix lea dat stuorámus – ja jáhkkimis olles sámeservoša deháleamos dáhpáhus. Eiddo dákkár kultuvrra nanosmahttin lea Yle barggu guovddážis, muitala Yle ođđasiid ja valáštallama operatiivvalaš hoavda Alex Fager.
Gilvvu gaskaovdanbuktimis oaidnit anárlaš ráppáriid Ailu Valle ja Amoc.
Buot bihtát ja luođit bohtet rávdnjenbálvalusaide guldalanláhkai duorastaga ja bearjadaga gaskasaš ija.
Sámi Grand Prixas leat mielde 12 ovdanbuktima
Dá leat lávlunoasi finalisttat:
Sofia Mienna & OK NIKO – ”Gos don leat?”
Mo geavvá go Guovdageainnu ráhkesvuođalávlla deaivvada Los Angelesa ritmma? Kajaanis vuolgán Niko Mansikka-Aho nappo OK NIKO gávpoga coahkkimis inspirerejuvvon nuohtta deaivvada guovdageaidnolaš Sofia Mienna hearkes teavstta, mii muitala váibmomorrašiin.
Oassi gehččiin sáhttá muitit Niko Mansikka-Aho UMK:s, gos son lei mielde jagis 2015 Eeverest-joavkkus. Su sohka ollá Gáregasnjárgii ja Avvilii.
Han Helge & Han Håkan – ”Ingen andre”
Tiktokas trenden ovddeš North Kid -gánddat lávkeba Sámi Grand Prix lávddi ala. Feastapoplágan bihtá duogážis lea goittot dáistaleapmi identitehtas: bihttá muitala vásáhusas go ii oro leamen ”doarvái sápmelaš”.
Caroline Johansson Kuhmunen – ”Dorvobáiki”
Ruoŧa musikálanásti Caroline Johansson Kuhmunen háliida lávket dál iežas rollaid olggobeallái. Su bihttá muitala dorvvolaš čiehkádanbáikki gávdnamis. Inspirašuvnna son lea ožžon iežas mánáin ja háliida ovttastahttit dasa maiddái ráhkisvuođa soga árbevirolaš ealáhussii, boazodollui.
Alo Joks – ”Mun lean”
Jus dus lea muhtinlágan miellagovva sámemusihkas, de dál gánneha vajálduhttit dan! Alo Joks buktá gilvui sevdnjes ja urbána, dáiddalaš pop-musihka. Bihtá ruohttasat leat mearrasápmelaš historjjás, mas lea jaskatvuođa steampal. Dán bihtás lea Joksa iežas sohkahistorjá, ja dát lea su vuohki váldit mearrasápmelaš suopmana fas davvisámegillii.
Kalle Urheim – ”Duottara bárnne / Tundra’s Son”
Kalle Urheim bihtá inspirašuvdna boahtá sámi mytologiijas beaivváža bártnis. Lávlla lea rámisvuođa ja ilu birra, fámolaš seaguhus etnalaš popas ja álgoálbmot musihkas – nu son ávvuda buot duoddara bártniid ja nieiddaid.
Rievdaduvvon 1.4.2026 dii 14.12: Kalle Urheim bihtás muitaluvvui álggus, ahte dat muitala su persovnnalaš vásáhusain. Álgoálgosaš teaskta ii addán rievttes gova das, mo Urheim hálida ovdanbuktit iežas dáiddalaš barggu.
Ellinor – ”Du dušši”
Ellinor Halvari lea nuppi geardde mielde Sámi Grand Prixas. Vuosttas geardde son lei gilvvus mielde jagis 2022. Dalle su SOÁ-joavku bođii nubbin. Dan maŋŋá son lea iežas sosiálamediain ráhkadan ovdamearkka dihte Adele ja Veronica Maggio bihtáin sámegielat veršuvnnaid. Dál de son viimmat buktá ovdan maiddái iežas soolomateriála. Ođđa bihtás son háliida deattuhit vuoigatvuođa leat dat gii don leat ja mo sámi identitehta galggašii leat lunddolaš oassi dálá árggas, ii dušše steampal.
Juoiganoasis olu persovnnaluođit
Sámi Grand Prixas gilvvohallet jođánis pop-bihtáid lassin maiddái árbevirolaš luđiin.
Sárá Nilut – ”Ayla Nutti”
Sárá Nilut lea bajásšaddan lávdečuovggain go lea mánnávuođa rájes leamašan eatni mielde iešguđetlágan lávddiid alde. Dán jagi son lávke okto lávddi ala. Son háliida dáinna gudnejahttit ustitvuođa ja ovdanbuktit mánnávuođa ustitbas Ayla Nutti luođi.
Ánte Niillas N. Bongo – ”Nášša álddut”
Ánte Niillas N. Bongo lea njulgestaga Sámi Grand Prix -veterána, son lea vuoitán gilvvu juoiganoasi jagis 2008. Dán jagi son juoigá iežas álddu. Luohti doalvu guhkás duoddariidda, bohccuid árbevirolaš miesseguovlluide.
Lars-Ánte Kuhmunen – ”Nils Issát”
Duođalaš máilmmimátkkošteaddji lea máhccan Sápmái 27 jagi maŋŋá. Kuhmunen lea johtán lávddiid alde USA:s ja gieskat barggai ovttasbarggu Norgga rádio orkeastarin KORK:in. Son rohtte gánddas luođi, gii válddii bearraša boazodoalu badjelasas okto go Kuhmunen buohccái. Luđiin son háliida čálmmustahttit čeavláivuođa das mo agálaš árbevierru bearrašis joatkašuvvá ja maiddái fuomášeami go mánát leat jo iehčanasat.
Per Bueng – ”Liv Slotte”
Per Bueng lea iežas servošis dovddus iežas eallima MacGyverin, guhte divvu buot – lei dat dasto muhtun mášen dahje fálláid hohkahallan luđiin. Dál son fállá juoidá mii lea hui erenomáš. Dábálaččat juoigi galgá dovdat luođi olbmo bures, muhto go Bueng geahčai NRK Reinlykke-ráiddu, son liikostii Liv Slottei nu sakka ahte luohti šaddai dego iešalddes. Dáinna son háliida movttiidit čájehit liikosteami.
Biret Risten Sara & Rávná Anti Guttorm – ”Inka Máhtte”
Headjaatmosfeara buktiba Sámi Grand Pixai Biret Risten Sara ja Rávná Anti Guttorm. Dát guovttos leaba mearkkašahtti árbevirolaš luođi gáhttejeaddjit ja leaba juoigan ovttas ovtta sámi stuorámus násttiin Mari Boinen gitta Japanis. Dán háve soai háliideaba čájehit geahččiide luođi sosiála fámu heajain, gos guossit šaddet oktan luođi bokte.
Iŋgor Nila – ”Marianne”
Iŋgor Nilas lea viiddis luohterepertoára. Dadjetge, ahte son lea ealli luohtearkiiva ja máhttá čuđiid jagiid boares luđiid. Son juoigá beaivválaččat gávcci sohkabuolvva sogastis. Dál Sámi Grand Prixas son juoigá iežas eahkiba Marianne. Dán luođis sohkabuolvvaid gaskii huksejuvvo deaivvadeami várás šaldi.
Divvojuvvon 6.3.2026 dii 9.38: Alo Joks bihtá namma lea Mun lean, ii Call in the Wind nu mo álggus čáliimet.
Divvojuvvon 31.3.2026 dii 9.33: Ánte Nillas Bongo luođi namma lea Nášša álddut, ii Nášša álddožiid nu mo álggos čáliimet.
