Ovllá-opera čájehuvvo Oulus vel moanat gearddit, maŋimuš čájáhus lea lávvardaga 28. beaivve guovvamánus.
Opera lea leamašan bivnnut ja dasa lea gidden máilmmeviidosaččat fuopmášumi. Oulu teáhtera doaimmajođiheaddji Anu-Maarit Moilanen muitala, ahte Ovllá-opera bokte beroštupmi lea leamašan stuorát go dábálaččat.
– Dathan lea loktanan oidnosii riikkaidgaskasaččat Eurohpás, ja maiddái Amerihkás lea beaggán, muitala Moilanen.
Moilanen lea ilus, go ooppera lea beassan ná bures oidnosii. Son lea oaidnán, ahte kultuvrralaš ovddasteapmi lea eiddo dál bivnnut dáiddamáilmmis. Oulu teáhterii lea dehálaš, ahte ovdamearkka dihte unnitloguid geahččanguovlu oidno maiddái lávddi alde.
– Háliidat buktit oidnosii iešguđetge duogážiin boahtti muitalusaid ja muitalusaid, maid mii eat ieža oamas, čilge Moilanen.
Opera lea buot doaibmiid olámuttus
Son šálloša sakka, go opera ii beasa johtit miehtá Sámi ja máilmmi. Son goittot sávvá, ahte Oulu maŋimuš čájáhusa maŋŋá eará doaibmit de dohppešedje opera dahkama vejolašvuhtii.
– Min maŋŋáhan dat opera lea buot doaibmiid olámuttus, de sávvat ahte dan dahkamii darvánit de eará sajiin.
Moilanen ávžžuha fitnat Oulus, juos háliida vel opera geahččat. Operas deaivvada oarjemáilmme dárkilit ráddjejuvvon dáidda nuohtahis luonddukultuvrrain.
– Dat syntesa lea mu mielas erenomáš fiinnis. Jurddašan, ahte juos juoidá ođđa háliida vásihit de dát lea dakkár, cavgila Moilanen.
Ovllá-opera beassá guldalit maiddái Yle Areenas.
