Smávva Eanodaga duottarlogahaga maŋimuš luohkkálaččaid dahjege abiturienttaid skuvlabargu nogai duorastaga hilbošemiin. Ovddas lea mánotbaji lohkanluopmu ovdal studeantaiskosiid.
Garra buolašge ii láivvidan skuvlla guođđima ilu. Sii besse guorbmebiillain vuojašit miehtá gili.
– Dál lea hui somás dovdu, go beassá skuvllas eret. Lei gal hui galmmas dál olgun vuojašit, Biret-Julianna Hætta muitala.
– Johtilit dat áigi golihii. Jurddašin vel, ahte lea guhkes skuvlabálggis, muhto nu dát beaivi bođii, dadjá fas Väinö Kotavuopio.
Sara Elina Valkeapää muitala, ahte sis leat plánain maid eahketdoalut.
Garra bargu easka álgá
Logahaga oahppit buot golmmas leat váhá gealdagas das, mo boahttevaš studeantaiskosat mannet.
– Vehás, ahte muhtun beaivvi mun in oba jurddahala dan birra. Muhtimin boahtá diekkár, ahte manin in sáhte dušše lohkat. Ja de mun in beasa skuvllas eret, muhto mun geahččalan dál vehá movttiidahttit iežan, dadjá Valkeapää.
Biret-Julianna Hætta mielas áigi orru mannamin nu johtilit, ahte vehá lea stressegoahtán.
– Dovdo, ahte dál ii leat šat nu olu áigi, ahte gal mun hui olu stressen. Movt dat manná, ahte beasságo čađa dan olles skuvlla, ja gal dat hui olu stresse, go leat nu olu ávdnasat masa galgá lohkat.
Väinö Kotavuopio dadjá diehtit, ahte jus hálida oažžut buriid árvosániid, de ferte viššalit lohkat.
– Muhto mu mielas dakkár áššiid ii gánnet stresset, maidda sáhttá ieš vaikkuhit.
Eará guovlluin Suomas abiturienttat leat ávvudan skuvlla guođđima jo mannan vahkus, muhto Sámi álbmotbeaivvi dihtii Eanodagas hálidedje dahkat dan easkka dál.
