Lappi gearretriekti lea dubmen boazoisida 60 jándora evttolaš fáŋgavuhtii behttosis, go fillii virgeolbmuid máksit borasspirevahágiid.
Duomu mielde boazoisit lei dolvon golbma nelgon bohcco meahccái ja lebben daid oaivvi ja čeabeha birrasiidda nuppi ealli vara. Ulbmilin lei čájehit, dego bohccuid livčče goddán boraspire.
Maŋŋelabbos biebmovirgedoaimmahat gávnnahii, ahte báikki alde dahkkon fuopmášumit eai stemme boraspirevahágiidda. Guovddášrihkuspolesa rihkusteknihkalaš laboratoria mielde bohccuid alde lei bohcco vara lassin čuvččá varra.
Boazoisit ieš šiittii dan, ahte livččii fievrridan bohccuid, muhto mieđihii iežas sivalažžan behttosii.
Boazoisit lei registreren vahátalmmuhusaid, maid vuođul mákse buhtadusaid su bearraša golmma boazoeaiggádii oktiibuot vuollel 5 000 euro.
Dubmejuvvon rihkkosat dáhpáhuvve jagiin 2021–2022. Rihkusášši dihtii dubmejuvvon boazodoalli ii leat šat iežas bálgosa boazoisit.
Áššis navde sivalažžan maiddái boazoisida bearašlahtu, muhto su áššáskuhttin hilgojuvvui.
Dasa lassin áššáskuhtti lei gáibidan sáhkkoráŋggáštusa ruhtabassamis bearraša boazoeaiggádiidda, geaidda spirebuhtadusat máksojuvvojedje. Duomu mielde sii eai lean diehtán rihkkosis eaige sii ráŋggáštuvvo.
Duopmu addui Lappi gearretrievttis guovvamánu 11. beaivve, iige dat leat lága fápmu.
Divvojuvvon 11.2. dii. 18.18: Muitaleimmet vuos boastut, ahte boazoisit šiittii ahte livččii fillen vahágiid. Son baicce mieđihii iežas sivalažžan behttosii.
