Gaskavahku lei erenomáš beaivi, go Mátta-Suomas ledje garra buollašat ja seamma áigge Suoma davimus gielddas Ohcejogas ledje lieggagráđat.
Ohcejoga báikkálaččaide ii leat mihkkige ođas, ahte guovvamánu álggus leat liehmut. Ohcejohkalaš Veikko Porsanger lea ovdalge oaidnán, ahte suttes meara guovllus boahtti davvebiekkat buktet lieggasa ja arvvige guovddášdálvái.
Maiddái ohcejohkalaš Birit Vuolab geahčai Ohcejotleagis ruovttus mihttáris, ahte olgun lei guokte gráđa liekkas. Son atná dábálažžan, ahte Sámis ja eandalii Ohcejogas leat guhkes buollašat ja dan maŋŋá fáhkkestaga bohtetge bivvalat ja manná lieggasbeallái.
– Ii moge nu imaš dálkesorta, árvala Vuolab.
Vuolab vásáhusaid mielde bivvalat bohtet eandalii skápma nohkama maŋŋá go beaivváš fas oidnostallagoahtá.
Erenomáš lea, ahte Mátta-Suomas leage seamma áigge báikkuid juoba 20 gráđa buolaš. Porsanger mielas lea buorre, ahte máddelabbos besset maiddái vásihit garra buollašiid.
Vuolab lea fuomášan seamma dili maiddái muhtumin geassit.
– Mis sáhttá leat dáppe goardi bahkka ja máddin sáhttá leat oalle čoasus. Mis lea liegga jiekŋamearra sealggeduohken ja máddin leages galbma Nuortamearra, lohká Vuolab.
