Riikkabeivviid ođđa čoahkkináigodat rahppui otne gaskavahku. Rahpansáhkavuoru doalai Dásseválddi presideanta Alexander Stubb. Son buvttii sáhkavuorustis maid ovdan sámeáššiid.
Stubb muittuhii riikkabeaiáirasiid das, ahte sápmelaččat leat Suoma áidna eamiálbmot.
– Dat mo mii láhttet sin vuostá, muitala olu mis servodahkan ja demokratiijan, celkkii Stubb.
Son dajai maid, ahte sámediggelága dohkkeheapmi mannan gease leamašan dehálaš mearrádus riikkabeivviin. Presideanta Stubb loktii sáhkavuorustis ovdan maiddái Sápmelaččaid duohtavuohta- ja soabadankomišuvnna barggu.
– Ávžžuhan váldit komišuvnna barggu duođas ja joatkit soabalašvuođa, nuppiid gudnejahttima ja ovttasbarggu.
Sámedikki lei rahpamis ovddasteamen stivralahttu Inka Musta. Son dadjá, ahte sámedikkis árvvoštit ahte presideanta Stubb loktii sámeáššiid oassin sáhkavuorus.
– Sápmelaččaid vuhtiiváldin suopmelaš servodaga oassin ja dan mearrádusbargama váibmosis lea dehálaš dieđáhus sihke sámeservošii ja min mearrideaddjiide. Mii giitit presideantta dán ovddas ja iežamet oasil mii háliidat ovddidit buorredáhtolaš gulahallama riikkabeivviid, stáhta ja sápmelaččaid gaskkas, kommentere Musta sámedikki dieđáhusas.
Riikkabeivviid rahpama sáhttá fitnat maŋŋegihtii geahččamin riikkabeivviid neahttasiiddus.
Sámedikkis lea buorre oktavuohta Stubbiin
Presideanta Stubb deaivvai sámedikki ovddasteaddjiid Presideantašloahtas mannan duorastaga.
Deaivvadeamis ságastalle earet eará ođđa sámediggelága ollašuhttimis, sápmelaččaid duohtavuohta- ja soabadankomišuvnna loahpparaporttas sihke dálkkádatnuppástusa váikkuhusain árktalaš guvlui ja sámiid eallinbirrasii.
Presideanta Stubb deaivvai sámedikki ovddasteaddjiid ovddit háve ođđajagimánus 2025.
Giđđat 2024 presideanta jođii davimus Sámis galledeamen sápmelaččaid. Son finadii dalle maid earet eará Njuorggáma skuvllas. Galledeami maŋŋá máŋggat sápmelaččat ožžo bovdehusa Presideantta iehčanasvuođadoaluide 6.12.2024.
