Aanaar kieldân lii vuáđudum uđđâ valastâllâmservi, mon nommâ lii Saariselän Loimu. Tom lii vuáđudâm juávkku, mii vuolgij ihe tassaaš Inarin Yritys -seervist.
Saariselän Looimu saavâjođetteijen lii väljejum oovdiš kištočyeigee Elias Valikainen. Sun muštâl, et tárbu vuáđudiđ uđđâ seervi šoodâi tast, ko Inarin Yritys ij orroom sijjân innig šiev servin. Suijân sun iätá, et jesâneh iä peessâm tuárvi jiänusân.
– Servi kolgâččij leđe jesânij haldâšum já heiviittâllum, iätá Elias Valikainen.
Elias Valikainen juátká, et ulmen ij lah leđe vuástálistemlihâstâs Inarin Yritysân.
Seervi molsom vaaigut positiivlávt saaveehliähtun
Saavâjođetteijee viljâ já kištočyeigee Eelis Valikainen še kuođij Inarin Yritys já njuškij Saariselän Looimu fáárun. Suu mielâst molsom lâi šiev miärádâs, mii uáinoo suu puátusijn.
– Tot nubástui nuuvt, et tile, moos mun karttim ton seervist hittoodškuođij muu valastâllâm, Eelis Valikainen muštâl Inarin Yritys -seervist.
Veikkâ Saariselän Looimu jesâneh iä lamaš aaibâs tuđâviih Inarin Yritys tooimân, Elias Valikainen ana áárvust puáris seervis.
– Inarin Yritys lii fijnâ servi já tast láá ennuv suottâseh já pyereh ulmuuh pargoost. Oroškuođij, et tot servipargo tobbeen ij lamaš innig tot, maid mij halijdiččijm servitooimâst.
Uđđâ valastâllâmseervijd kávnoo saje
Inarin Yritys stivrâ västid Yle Sáámán, et sii seervist puohâin lii máhđulâšvuotâ uážžuđ jienâs kulluđ.
– Moonnâm paje poođij tiättun, et muáddi seervist tyeimee halijdij eenâb jieijâs uáinusâš tooimâ. Yritysâst mij lep kuittâg-uv juátkám iänááš tooleeb toimâmvuovij mield, siämmást tooimâ ovdeedmáin. Stuárráámus uási seervi čyeigei já jesânij mielâst tot lâi pyeri nuuvt.
Yritys meid čielgii, et servi, mii tuáimá räijejum resurssijn ij pyevti heiviittiđ tooimâs eidu jyehi ovtâskâs ulmui.
Sehe Inarin Yritys já Saariselän Loimu uáinih, et kieldâst lii saje maaŋgâ valastâllâmsiärván.
– Aanaar lii kieldân ton verd styeres, et amahân toho kulmâ valastâllâmseervi šiättá. Tääl mist lii jyehi stuorrâ päikkikoddeest valastâllâmservi. Anarist lii Yritys, Avelist lii Lapin Sudet ja Suáluičielgist lii Loimu, Elias Valikainen huámášit.
Inarin Yritys lasseet, et lii ain pyeri, et valastâlmist já servipargoost movtáskâm ulmuuh uážžuh máhđulâšvuodâid uásálistiđ maaŋgâlágán toimáid.
– Jyehi seervist lii luándulávt jiejâs visio já áárvuh, moin vuáđudiđ já ovdediđ tooimâs.
Loimu vuosmuid čuoigâmkištoidis kolgii uárnuđ 14.–15. peeivi kuovâmáánust Aanaar Juvduuväärist. Toh láá macâttum korrâ puolâšij tiet.
Rievdâdem 13.2.2026 tme 10:41: Saariselän Looimu tälvikištoh láá macâttum puolâšij tiet.
