Avvila bálvalandállu Männikkös gávdne ođđajagimánu 7. beaivve iđđes vuoras nissona jápmán iežas seaŋggas. Áššis dieđiha Lappi boleslágádus. Boles dutká nuppi ássi oasálašvuođa dáhpáhussii.
Bargoveahka dieđihii áššis heahteguovddášii iđitgávcci áigge. Lanjas lei leamašan maiddái nubbi bálvalandálu nissonássi, guhte veallái belohahkii rupmaša alde. Nubbi ássi lei iđida áigge dálá dieđu mielde mannan vahágis jápmán ássi latnjii ja čákŋan seŋgii. Vuollái báhcán olmmoš jámii.
Boles dutká ášši dán muttus jápmimadagaheapmin. Eahpádusvuloš lea nubbi olmmoš, guhte lei lanjas. Boles ii navdde dán muttus goittotge áššis dáhtolašvuođa dahje veahkaválddi. Guktotge leigga bálvalandálu ássit.
Bargoveaga eai navdde sivalažžan rihkkosii, muitala dutkanhoavda rihkuskomisario Iikka Rantahalvari.
– Dange ášši dárkkisteapmi lea gaskan. Jus orru, ahte livčče dáhpáhuvvan healbadeapmi, de dalle bargoveaga sáhtášii navdit rihkkosis, muhto ii goittot vel, dadjá Rantahalvari.
Lappi boleslágádusas lea dáhpáhusa dutkan vel gaskan. Rantahalvari muitala, ahte sii áigot vel gullat muhtin olbmuid áššis.
Lihkohisvuođaid dutkanguovddáš (Otkes) lea maid dutkagoahtán ášši.
Otkesa dutkamuša váldodeaddu lea bálvalanovttadagaid muitobuohcciid dorvvolašvuođa sihkkarastin. Lassin dat čielggada muitobuohcciid ráddjendoaimmaid dorvvolašvuođa ja eiseválddiid doaimmaid.
Dutkan bistá 9–12 mánotbaji.
Stuorámus oassi ássiin muitobuohccit
Gažaldagas lea birrajándora bálvalanássanovttadat, gos leat 57 báikki. Stuorámus oassi sis leat muitobuohccit.
– Dát lea issoras váivves dáhpáhus ja mii váldit oasi morrašii. Min jurdagat leat buot oasálaččaid ja sin oapmahaččaid luhtte, cealká ahkeolbmuid bálvalusaid hoavda Annukka Marjala Lapha dieđáhusas.
Ođas beaiváduvvo.
