Mađhâšem lasanem vuáttoo meid páihálij kyeliääiti, Aanaarjäävri alne. Ovdil juovlâid Meccihaldâttâs uážui epitáválii almottâs lovettemes láávuin Aanaarjäävri alne.
– Maaŋgâ saajeest pottii almottâsah. Mij vaaldijm ohtâvuođâ mađhâšemirâtteijei já piivdijm tuálvuđ meddâl, ko taid ij lamaš miettâm eennâmomâsteijest, taan tábáhtusâst Meccihaldâttâsâst, muštâl Toni Juuti, Meccihaldâttâs eennâmkevttimäššitobdee.
Mađhâšemirâttâs lâi uuccâm miettâm lávusoojijd Meccihaldâttâsâst, mut meendu maŋŋeed. Juuti mield luuvijd ličij pyeri selvâttiđ ucemustáá ihepele ovdâkietân.
– Roovvâdmáánu aalgâst poođij ucâmuš. Mist iä kiergânâm tom kieđâvuššâđ ovdil ko taah láávuh lijjii ceggejum. Mun oskom, ete taat tábáhtui huápui já tiäđu potkânem keežild, arvâl Juuti.
Lovettemes kiävttu lii háitulâš ovdâmerkkân roskim tiet ige kuávlu kevtteemere pyevti kontrollistiđ. Juuti arvâl, et tavekuávlu mađhâšem lassaanmist lii uási áášán.
Meccihaldâttâs meccitärhisteijee lii uđđâivemáánust iällám täärhistmin, et láávuid láá sirdám meddâl. Keevâtlávt Meccihaldâttâsâst láá uccáá resurseh kocceeđ lovettemes tooimâ staatâ enâmijn, ko ubâ Aanaar já Ucjuv kuávlust tuáimá tuše ohtâ meccitärhisteijee.
Tondiet Meccihaldâttâs tuáivu, ete páiháliih almottiččii aktiivlávt sijjân tágárijn tábáhtusâin. Irâttâsâid Toni Juuti vuolgât tiervuođâid, et ääigild selvâttiđ eennâmomâsteijee miettâm.
Koskâpuddâsii láávu ceggim staatâ enâmáid lii loválâš. Jis saahâ lii irâttâstooimâst já eennâmkevttim pištá kuhheeb ääigi, te talle lii pyeri tärhistiđ taarbâš-uv love, muštoot Juuti.
Irâttâs taarbâš távjá ohtsâšpargosopâmuš Meccihaldâttâssáin, jis irâttâs ávhástâl toimâstis staatâ enâmáin tâi Meccihaldâttâs vandârdemsoojijn.
