Dál ruostibuollašiid áigge lea liggen-, čáhce-, ja áibmomolsunsuorggi fitnodagain leamašan hušša. Ovdamearkka dihte Ylä-Lapin LVI:s lea leamaš ollu bargu dáin buollašiin ja sin bargit leat jámma johtemin miehtá Anára gieldda, muitala fitnodaga barggujođiheaddji Kari Karppinen.
Jus iđđes lihkká ja fuobmá ahte kránas ii boađe čáhci, de rávvesta ohcejohkalaš čáhce- ja liggenrusttegiid divodeaddji Veikko Porsanger maid sáhttá iskat, ovdal go riŋge ámmátolbmo veahkkin.
– Plastetčáhcebohcciid, main lea dakkár suodjebohcci, sáhttá nuppegeaži bossut vuovttaid goikadanaparáhtain ja nuppegeahčái fas bidjá noavkki geassit áimmu. Ii mana go vihtta minot de lea suddan dat bohcci, Porsanger rávve.
Čáhce- ja duolvačáhcebohcciid jiekŋun ja liggenrusttegiid cuovkaneapmi leat buot dábálamos váttisvuođat ná garra buollašiin, dadjá Kari Karppinen Ylä-Lapin LVI:s.
Vearrámus dáhpáhusat Veikko Porsanger vásáhusa mielde leat leamašan, go gupparbohccit leat jikŋon ja luoddanan. Son rávve ahte daid suddadeamis ferte leat hui várrugas, ja dalle gal dáidá lea buoremus riŋget divodeaddji veahkkin.
– Ja mainnage dolain ii gal gánnet álgit daid bohcciid ligget, go sáhttá geavvat nu ahte buollá olles dállu seammás, Porsanger deattuha.
Veikko Porsanger muittuha maid, ahte liikká gánneha álo riŋget ámmátlažžii, jus lea veháge eahpesihkkar.
– Miihan gal leat hárjánan buollašiidda ja olbmot leat jo hárjánán dáidda váttisvuođaide, muhto jos ii ieš máhte ligget daid bohcciid, de áinnas gánneha riŋget.
