RadioJus-Sunná, Sunna Nousuniemi álggahii geasi loahpas Skábmagovat-filbmafestivála dáiddalaš jođiheaddjin. Dál son leage beassan bargat vuosttas festivála čohkkemin ja filmmaid válljet dohko.
Filmmaid válljema várás ferte geahččat olu filmmaid ja dathan dat easkka somá leage. Nousuniemi ii jáhkke son lea goassige geahččan nu olu filmmaid go dán jagi.
– Dat lea veháš dakkár agálaš filbmaeahket.
Nousuniemi joatká Jorma Lehtola barggu dál. Lehtola lei festivála dáiddalaš jođiheaddji máŋgalot jagi ja Nousuniemii lea stuorra gudni joatkit dainna bargguin.
– Munhan lean leamašan veháš hirpmahuvvan, ahte masa mun lean álgán.
Nousuniemii bargu ii leat áivve vieris. Son lea mánnávuođa rájes johtán Skábmagovain ja gávdnan doppe iežas saji filbmadahkkin. Dasa lassin lea son leamašan Skábmagovaid bargojoavkkus mielde jo 11 jagi ja beassan oahppat olu eandalit Lehtolas, guhte lea ain sutnje doarjagin.
– Jormas lean eandalit oahppan olu mo válljet filmmaid ja mo gávdnat geasuheaddji filmmaid deikke Anárii. Letnege olu gulahallan ja mun lean álo sutnje riŋgestan, juos dárbbašan ráđi.
RadioJus-Sunná háliida gudnejahttit buot dan stuorra barggu, maid Lehtola ja eará festivála johtuibiddjit leat bargan iige son oainne dárbbu menddo olu álgit rievdadit.
– Maiddái dieđusge sávan, ahte ovddosguvlui sáhttá veháš álgit ođasmahttit dan festivála ja álgit geahččat makkár molssaeavttut ja vejolašvuođat mis leat, maid eai leat vel geargan smiehttat dahje geahččalit.
Filmmat buktet olbmuid oktii
Sunna Nousuniemi oaidná dáhpáhusas earáge mearkkašumi go dušše filmmaid čájeheami. Son atná dehálažžan, ahte festivála lea báiki, gosa olbmot besset čoahkkanit oadjebasat ovttas návddašit kultuvrra ja gánske maiddái biepmat miellagovahusa.
– Dasa lassin, ahte mii čájehit mii dál dáhpáhuvvá nu dáidagiin mii fállat maiddái eará vejolašvuođaid. Makkár máilmmit sáhtašedje leat, mat eai leat vel. Muhtinlágan utopiijat, lohká Nousuniemi.
Dán jagi festivála fáddán lea girjás ráhkesvuohta. Ođđa dáiddalaš jođiheaddji sávváge, ahte ráhkesvuohta, illu ja liekkusvuohta buktet olbmuid oktii.
Nu mo dábálaččat, festiválas beassá oaidnit ođđa filmmaid nu Sámis go eará eamiálbmogiin maid. Festiválas lea maiddái oanehifilbmačájáhusat, maidda lea čohkkejuvvon namalassii arvedávgemuitalusat.
Filmmaid lassin oaidnit beassá ovdamearkka dihte Áávu-dánsunbihttá, man lea bagadallan Auri Ahola.
– Min prográmma lea kuraterejuvvon diená, ahte juohkehaččii juoidá. Mii leat háliidan deattuhit ilu ja ráhkevuođa ja hutkáivuođa ja ávvudit dan.
Skábmagovat-filbmafestivála lea dán jagi 22.-25. beaivve ođđajagimánus. Skábmagovaid prográmma lea oaidnin láhkai festivála neahttasiiddus.
