Sápmelaččaid duohtavuohta- ja soabadankomišuvnna lei diŋgon guokte dokumentárafilmma raportta oktavuhtii. Filmmain muitaledje boazodoalu hástalusain ja luossabivddus. Daid čájehedje vuosttas geardde mannan vahku duorastaga Helssegis.
Aslak Paltto vásihii filmma dahkamis váddasamosin čohkket boazodoalus diibmobeal guhkkosaš filmma, muhto jáhkká ahte lihkostuvai das.
– Easkka go vulggii jearahallat daid olbmuid, de dan bokte čielggaid ahte mii dat máinnas lea, ahte mii boahtá doppe ovdan. Dálá áigge hástalusat ledje dasto maid bokte fertii fievrridit ovddosguvlui dan dokumentára, muittaša Paltto.
Paltto dagai filmma ovttas govvejeaddji Ville-Riiko Fofonoffain.
– Deháleamos lei, ahte mus lei govvejeaddji ja ferte leat dakkár, gii lea ovdalge govven. Ville-Riiko logaige, ahte das leat nu ollu bohccot, ahte ii ovttage filmmas goassige, bohkosa Paltto.
Nuppi filmma dahkkit hálideigga muitalit das mo Deanu luossabivdogielddus lea váikkuhan Ohcejoga guovllu sápmelaččaide.
– Dieđusge dát lea dehálaš ášši, ahte lei viehka somá dahkat dán filmma. Dieđusge mun dieđán dán ášši birra ollu ja mun hete áddejin ahte mun lean dat rivttes olmmoš dahkat dán go mun lean čuvvon ja váikkuhan Deanu áššiin nu olu, muitala Hans Pieski.
Son lea bargan filmma ovttas iežas eamidiin ja čeziin. Pieski giitalage, ahte eamida Aura haga filmmas ii livčče šaddan dakkár go das šattai.
Aura Pieski muitala, ahte ii lean álki álgit ráhkadit filmma. Luossamoraš lea stuoris Ohcejot guovllus.
– Dat lea ain dakkár savokeahtes hávvi nu ahte min bearrašis maiddái. Das mun vehá ballen, ahte mo lihkostuvvá dákkár rašes áššis dahkat dan filmma, dadjá Aura Pieski.
