Gaskavahku badjel 500 máná čoahkkanit Helssegii stáhtaministtar Petteri Orpo iehčanasvuođabeaidoaluide. Juohke gielddas leat bovden 2 máná ovddastit sin gieldda.
Eanodagas mátkái vuolgiba Per Jovsset Magga Njunnásis ja Hilja Kotavuopio Gilbbesjávrris. Guktot leigga movtta go gulaiga, ahte justa soai beassaba Eanodaga gieldda ovddas dohko.
– Áibbas somás dovddut ledje, muitala Magga dan bottus go gulai, ahte justa son lea válljejuvvon mátkái.
– Duohta somá, dadjáges Kotavuopio.
Eanodagas vuorbádedje mánáid gaskkas geat mátkái besset. Mánáid iehčanasvuođabeaidoaluin juohkehaš dearvvaha stáhtaministtara.
Magga ii áiggo goittot sámegillii dearvvahit su ja dasa lea čielga sivva.
– Orpo ii soaitte máhttit sámegiela.
Leaba dárkilit smiehttat mo gárvodeaba
Dán jagi temán lea Yhdessä rohkeammin, nappo ovttas roahkkadabbot. Seammá fáttás juohke mánná galgá váldit fárrui dáidaga, man ovdanbuktá stáhtaministarii.
Per Jovsset Magga áigu bidjat dasa návccaid ja manná duojár Maarit Magga lusa dahkat dan.
Maiddái Hilja Kotavuopios lea jo čielga plána iežas dáidagii, das boahtá oidnot su ruovttuguovlu.
– Das lea Sána-duottar ja min golbma beatnaga.
Go doaluide vuolgá, de čiŋadithan maid ferte.
– Mus lea biktasat, main leat Suoma leavgga ivnnit, muitala Kotavuopio.
Per Jovsset Magga lea fas smiehtadan, ahte báhkkanago gávttiin menddo sákka viesus, gos leat máŋgačuođi máná. Vihkkehallama maŋŋá su goit oaidnit gávttiin.
Mánáid iehčanasvuođabeaidoaluid sáhttá čuovvut Yle Areenas njuolggosáddagis. Sátta álgá ihttin gaskavahku diibmu 12.30.
