Lääʹddjânnam ortodookslaž ceerkavsååbbar tuʹmmji mââimõõzzâst saaʹmid kuõskki lääʹǩǩmuttsi joouk skamm-mannu loopp ceerkavsåbbrest. Saaʹmin lij täʹst ooudårra oudsteei nuʹtt pââimõs tuʹmmstõktuâj orgaanâst ceerkavsåbbrest ko še Tâʹvv-Lääʹddjânnam seäʹbrrkååʹdd suåvtõõzzâst da seäʹbrrkååʹdd välddõõzzâst.
Tät leäi jõnn ouddnummuš saaʹmid, vuäinn Saaʹmi siidsåbbar piisar da väärrouddooumaž Terhi Harju.
– Leäm tuõđi šiõǥǥ miõlin täʹst, što sij lie priimmâm lääʹjj muttsid. Saaʹmi oudsteei leʹčči ââʹn staanum tõn mâŋŋa, ko lääʹǩǩeʹtǩǩõõzz leʹčče primmum. Mââimõõzzâst piâssâp nõõmeed oudsteei täid koolm jeeʹres tässa ceerkav vaaldšummšest, särnn Harju.
Siidsååbbar lij määŋgid iiʹjjid kåittam oouʹdeed ääʹšš da määŋgid iiʹjjid saaʹmi oudsteei-äʹšš lij leämmaž ǩiõttʼtõõllâmnalla ceerkavsåbbrest, mušttal Harju. Mââimõsân saaʹmi oudsteeiäʹšš mõõni čõõđ.
– Tuõđi leäm kuärǥast täʹst, što lij tän rääʹjest tät äʹšš. Täʹst lij ortodookslaž saaʹmid jõnn miârktõs. Mââimõõzzâst veerǥlânji saaʹmi jiõnn vuäitči leeʹd toʹben kuullâmnalla vaaldšemtääʹzzest, ceerkavtääʹzzest. Tõt lij jõnn äʹšš, särnn Harju.
Tuäivat, što pueʹtti ceerkvallaš vaalin saaʹmin leʹčči jiijjâz oudsteei nõõmtum
Ceerkavsåbbrest saaʹmi oudsteei kuõskki lääʹǩǩmuttâz ravveet veâl mättʼtõs- da kulttuurministeriast. Saaʹmi siidsåbbrest tuäivat, što aaʹššin ij taarbšeʹče teänab vueʹrdded.
– Tuäivam, što tõt leʹčči samai jåʹttlõs ǩiõttʼtõõllmõš. Tuäivam, što lääʹjj muuttâseʹtǩǩõs leʹčči nåkkam, što leʹčči tåʹlǩ måtam eeʹjj äiʹǧǧ tõõzz, ko piâssâp oudsteeʹjid vaʹlljeed, smeâtt Harju.
Lappi kappelseäʹbrrkååʹdd papp, eʹčč Jaakko Vainio rämmaš še, što kuuʹǩǩ vuõrddum oudsteeiäʹšš ouddan ââʹn.
– Lij nuʹtt ceerkva ko še saaʹmid vääžnai, što sääʹm vuäǯǯa jiijjâz jiõn kuullâmnalla. Ceerkva teâđast tõʹnt, što kuullâp, mâid sääʹm haaʹlee puʹhtted ceerkvallaš valdšma.
Vainio tuäivv še, što ministeriatääʹzzest ääʹšš ǩiõttʼtõõllmõš leʹčči njueʹbǯǯel.
– Tõt lij šiõǥǥ lääʹǩǩeʹtǩǩõs, ko sääʹm lie jiijj piâssâm vuässõõttâd tõn valmštõõllmõʹšše. Tuäiv mieʹldd tät ouddan tän halltõspââʹj ääiʹj nuʹtt, što Saaʹmi siidsååbbar peäss nõõmted pueʹtti ceerkvallaš vaalin jiijjâs oudsteei, särnn Vainio.
