Turkus čoahkkanan Suoma evangelalaš-luteralaš girku girkolaščoahkkin mearridii čáhkadit girku guovddášfoandda jagi 2026 bušeahttaevttohussii 25.000 euro mearreruđa girku bargiid sámegielaid ja kultuvrraid oahpuide.
Mearreruhta laktašuvvá Sápmelaččat girkus -fitnu ávžžuhusaid ollašuhttimii. Okta ávžžuhusain guoská áiddo gielaid ja kultuvrraid skuvlejumi ovddideami. Girkolaščoahkkima dál dahkan mearrádusa mielde mearrádusaid mearreruđa geavaheamis dahká Oulu bismagotti duopmokapihttal.
Praktihkas giellaskuvlenáššiid Oulu duopmokapihttalis válmmaštallá sámebarggu čálli Erva Niittyvuopio.
– Eandalit go jurddaša vaikko boarrásut olbmuid, de lea hui dehálaš ahte sii sáhttet fidnet báhpa bálvalusaid sierra sámegielain. Dasto nuoraid- ja mánáidbarggus livčče dehálaš, ahte mánát ja nuorat beasášedje maiddái girku rieggáin, maidda sii oassálastet, gullat dan iežaset eatnigillii, dadjá Niittyvuopio.
Son dadjá, ahte girkus barget dan ovdii ahte buot sámegielat livččejit seamma árvosaččat. Bargit sáhttet ieža válljet, man giela hálidit oahpahallat.
Niittyvuopio oaidná maid dehálažžan, ahte eandalit Anáris livččejit bargit, geat máhttet maid anáraš- ja nuortalašgiela.
Konkrehtalaš ovdánanlávki, cealká bisma
Bisma Jukka Keskitalo illuda girkolaščoahkkima mearrádusas. Girkus lea ovtto dárbu bargiide sihke Sámis muhto maiddái máddelabbos, geat gulahallet sámegielaiguin ja dovdet kultuvrra.
– Lean movtta das, ahte Sápmelaččat girkus -fidnu buktá dál konkrehtalaš ovdánanlávkkiid. Anan vealtameahttumin, ahte mearreruhta mieđihuvvo joatkagis jahkásaččat, bisma Keskitalo muitala.
Sápmelaččaid girkolaščoahkkima ovddasteaddji Aslak Pekkala oaidná girkolaščoahkkima mearrádusas stuorra mearkkašumi.
– Girkolaščoahkkima mieđihan ruhtadeapmi lea dehálaš lávki girku lohpádusas buoredit sápmelaččaid gielalaš vuoigatvuođaid girkus. Dát addá doaivvu dasa, ahte girkomet lea čatnasan lohpádusaide ja ávžžuhusaide, maid dat lea dahkan, lohká Aslak Pekkala.
Sápmelaččat girkus -fidnu ollašuvai jagiin 2023-2025 ja miessemánus 2025 dollojuvvon loahppameassui, mas earkebisma Tapio Luoma ánui olles girku ja buot bismaid beales sápmelaččain ándagassii vássánáiggi boasttodaguid.
