Avvila dearvvašvuođaguovddáža doavttirgohcima plánejit boahttevuođas gáržžidit seastinsivaid dihte. Maid Muoná seaŋgaossodatbáiki ja Gárasavvona dearvvašvuođadálu beaivválaš doaimma evttohit heaittihit.
Lappi buresveadjinguovllu ráđđehus lea dohkkehan evttohusa bálvalanfierpmádaga nuppástusain maŋŋebárgga 21.10. Loahpalaš mearrádusa dahká goit Lappi buresveadjinguovllu guovlostivra.
Hápmosis evttohit, ahte doavttirgohcin Avvilis livččii rabas dušše beaivet ja idjii dat giddejuvvošii. Geavatlaččat dat dárkkuha dan, ahte sámiid ruovttuguovllu davveosiin livččii measta 500 kilomehtera mátki birra jándora gohcimii Roavvenjárgii.
Lappi buresveadjinguovllu dearvvašvuođabálvalusaid doaibmasuorggijođiheaddji Miia Palo muittuha, ahte Avvila oasil mearrádusaid eai leat vel dahkan. Dál su mielde lea vel áigi ságastallat ja váikkuhit áššái, go guovllostivra dahká mearrádusaid easkka juovlamánus.
– Riska lea sihkkarit dat, ahte ovttaskas buohcciid gárttašedje sáddet dasto Roavvenjárgii, maid dálá dilis sáhtášii dikšut dainna, ahte doavttir boahtá ihkku dearvvašvuođaguovddážii báiki ala dikšut olbmo.
Áigot heaittihit maid Muoná seaŋgaossodaga
Bálvalanfierpmádatplánas evttohit maid earret eará heaittihit Muonás seaŋgaossodatbáikkiid ja Gárasavvonis dearvvasvuođadálu beaivválaš doaimma.
Lappi buresveadjinguovllus eai hálit máksit seinniin, muhto baicce sirdit dáid ruđaid bálvalusaid ordnemii.
– Bálvalusat eai leat seammá go ovdal ja gal dat geavatlaččat dárkkuhivččii dan, ahte dávjjit gártá vuolgit Gárasavvonis Heahttái, dadjá Palo.
Son muitala, ahte Eanodagas ii leat vel ruoktobuohcceviessodoaimma. Ulbmilin goit livččii oažžut dan vai maiddái Eanodagas dikšu livččii lahkalabbos eandalii Heahtá guovllus.
Palo muittuha, ahte namalassii Muoná seaŋgaossodat lea bálvalan Eanodaga sámiid ja sámeguovllu olbmuid.
– Muhtun áššit buorránit, muhto buohcceviesu seaŋgaossodatdoaibma sirdašuvvá guhkkelebbui. Juos dat sirdojuvvo Gihttelii, de dasto lea dehálaš fuolahit, ahte doppe leat sámegielat bargit ja bargit geat dovdet giela ja kultuvrra. Dat ossodat bálvala Eanodaga olbmuid, ja dat lea sámeguovllu gielda.
Sámedikki dorjala šluhttet seastinevttohusaid
Ovttasbargoguimmiin, čanastatjoavkkuin ja buresveadjinguovllu doaibmaorgánain lea vejolašvuohta cealkit evttohuvvon bálvalanfierpmádaga nuppástusain skábmamánu 21. beaivve rádjái.
Sámediggi dieđihii gaskavahku, ahte dat ii dohkket ođđa heajosmahttimiid sámegielat dahje sámiid ruovttoguovllu sode-bálvalusaide.
Sámedikkis jáhkket, ahte bálvalusaid sirdin eret sámiid ruovttuguovllus heajudivččii olbmuid vejolašvuođa geavahit bálvalusaid sámegillii ja váikkuhivččii maid olbmuid dorvvolašvuođa vásáhusaide.
Sámedikki sadjásaš ságadoalli Tuomas Aslak Juuso mielde seastindoaimmat orrot meariheamit, go váldá vuhtii sámiid heajut sajádaga sosiála- ja dearvvašvuođadivššus.
– Mii doarjalit Lappi buresveadjinguvlui, ahte dat šluhtte daid evttohusaid, Juuso muitala dieđáhusas.
Sámedikkis fuomášuhttet maid, ahte Lappi buresbirgenguovlu livččii galgan ráđđádallat ja ovttasdoaibmat Sámedikkiin seastindoaimmain jo válmmaštallanmuttus. Juuso mielde sámediggi guorahallá joatkkadoaimmaid áššis.
Lappi buresbirgenguovlu lea gaskavahku sádden Sámediggái bovdehusa ráđđádallat áššis.
Dievasmahtton 23.10.2025 diibmu 09.31 diehtu, ahte Lappi buresbirgenguovlu lea bovden Sámedikki ráđđádallamii ja diehtu das, ahte Sámedikki oainnu mielde áššis livččii galgan ráđđádallat ja ovttasdoaibmat singuin jo válmmaštallanmuttus.
