Badjelaš 60-jahkásaš dievdu jámii njealjejuvllatlihkohisvuođas Eanodagas.
Heahteguovddáš oaččui lávvordaga iđđes almmuhusa njealjejuvllagis mii lei gopmut ja man vuolde lei dievdu. Almmuhus bođii báikkis mii lea Eanodaga Heahttá márkanis sullii 20 kilomehtera davveoarjjás.
Dáhpáhusbáikkis dahkkon vuosttašveahkis ii lean šat ávki ja dievdu jámii.
Lihkohisvuohta dáhpáhuvai meahcceluotta alde.
Lihkohisvuođas jápmán báikegoddelaš dievdu lei johtime akto ja su gávnnai muhtin gii lei johtán dan seamma meahcceluotta dan maŋŋá, go lihkohisvuohta lei dáhpáhuvvan.
Boles ja johtolatlihkohisvuođaid dutkilávdegotti dutket lihkohisvuođa.
