Säämi máttááttâskuávdáá uđđâ anarâškielâ já kulttuur uáppeeh láá čokkânâm Aanaar Kuáskimnjaargân kuálástemkuursân.
Viermijd suápudijn čohčâpiegâ pááruin sij uáppih anarâškielâ lasseen meid merhâšittee uási kulttuurist, kuálástem.
Iänááš uási uáppein láá anarâšah, kiäh halijdeh väldiđ suuvâs kielâ maassâd. Taan ive vuosmuu keerdi almaah láá eenâb ko nisoneh.
– Amahân tääl láá meid almaah movtáskâm iäláskittiđ kielâ, juurdâš anarâškielâ já kulttuur kuursâ máttáátteijee Iiris Kangas.
Ohtâ sist lii Pajetuárnusist šoddâm Janne Aikio. Suu mielâst lii lamaš hitruu opâttâllâđ suuvâs kielâ.
Meid Anarist šoddâm Heikkâ Nikula haalijd oppâđ ááhus eenikielâ pyereest. Suu kaandah sárnuv anarâškielâ já tuoivân ličij sárnuđ anarâškielâ meid pääihist.
Heikkâ Nikula kálgá viermijd tego hárjánâm kuálásteijee, ige iimâšgin, kuálástem lii suu mielâmield puđâldâs.
Avveel Maati Maati Teertu Joret Maria Okko ađai Okko Kausalainen movtáskij meid opâttâllâđ suuvâs kielâ. Anarâškielâ algâuápuid sun kiergânij čođâldittiđ siämmást ko juuđij Säämi máttááttâskuávdáá korrâtuojij linjá.
– Ton maŋa mun smiettim, et tääl ličij pyeri luuhâđ anarâškielâ, ko ij lamaš mihheen eres vuáváámijd. Taat lâi pyeri äigi toos.
Jaakko Korppila mielâst ááhu eenikielâ opâttâllâm lii lamaš mielâkiddiivâš, mut meid vaigâd. Pargohuápui keežild ive puudâ väldim ij lamaš máhđulâš ovdil, tääl kuittâg kavnui hiäivulâš puddâ luvâškyettiđ sämikielâ.
Saammâl Aailâ Juha Anniliina ađai Anniliina Lassila haalijd oppâđ suuvâs kielâ vâi puáhtá kevttiđ tom perruin já uážžuđ kielâ maassâd.
Nuorttâ-Suomâst puáttám šoŋŋâdâhaktivist Vilma Leppänen haalijd oppâđ anarâškielâ vâi puáhtá porgâđ jurgâleijen. Sun niävdá et uážuččij jurgâliđ čaabâkirjálâšvuođâ já tiivtâid ucebijd kieláid.
Avveellâš Reetta Viljaharju tuoivân ličij oppâđ ááhus kuohtuid päikkikielâid: anarâškielâ já nuorttâlâškielâ. Pärnin sun luuvâi nuorttâlâškielâ já tääl lâi anarâškielâ vuáru.
Taan ive anarâškielâ já kulttuur kurssâ lii keppisub já uánihub ko táválávt. Ovdâmerkkân kielâmiäštárteivâdmeh váiluh ollásávt.
”Mottoomlágán totkee karrieer lam ucâmin. Mun lam meid máttáátteijee, te vaarâ uusâm meid máttáátteijeepargoid anarâškielân.”
Kuálástemkuursâ máttáátteijee lii Yrjö Musta. Sun muštâl, et viermij suáppum lii moonnâm pyereest veikkâ jäävri aln pieggij-uv. Sun lii moovtâ tast, mon pyereest uáppeeh sárnuh sämikielâ jo taan muddoost veikkâ uápuh láá álgám eskin čohčâmáánust. Ehidist sij herskusteleh vorâs suovâskuolijn.
