Soađegilis leat álggahan pionerabarggu sámemánáid giellabálgá ovdii. Gielddas lea doaibmagoahtán dán čavčča rájes giellabálggiskoordináhtora bargu, man dárkkuhus lea ovdamearkka dihte ovddidit ja geahčadit máná sámegiela bálgá ollašuvvama beaiveruovttus gitta skuvlii.
Dehálaš dál álggus lea vuos dieđu juohkin, muitala oahpaheaddji ja giellabálggiskoordináhtor Miira Suomi.
– Eandalit dat, ahte olbmot dieđášedje, ahte mis lea vejolašvuohta čađahit giellabeasi dahje dan sámegielat árrabajásgeassima. Ja dasto skuvlla sámegillii dahje giellalávgunoahpahusas.
Giellakoordináhtoriid ulbmilin lea čatnat oktavuođaid iešguđet doaibmiid gaskii árrabajásgeassimis ja skuvllas, hukset plánaid ja juohkit maid dieđu gieldda politihkkariidda sámeoahpahusas.
Giellalávgunoahpahusa oassi diimmuin lea sámegillii ja oassi suomagillii
Soađegili gielddas sámegiela oahpahusa skuvllas oažžu giellalávgunluohkás dahje giellalávgunoahpahusas. Dalle oassi skuvlaávdnasiin lea sámegillii. Giellalávgunoahpahus álggii sullii guhtta jagi dassái, muitala Suomi.
– Mii fállat dán jagi sámegiela dieđusge giellalávgunoahppiide ja maiddái oskkoldaga ja govvadáidaga. Eará diimmut leat dasto suomagillii.
Vuohčus lea sámegielat luohkká ja maiddái giellalávgunluohkká. Seamma dálu nuppi geažis doaibmá giellabeassi ja nuppi geažis fas vuođđoskuvlla.
Giellabeasi šiljus mánát stohket ja ohppet seammás sámegiela. Bargit sámástit ja dat movttiidahttá maid mánáid.
– Somá lea go mis leat sihke hui unna mánážat, geat eai vealttekeahttá huma vel maidige. Ja dasto mis leat boarrásepmosat viđa jahkásaččat, nu sis lea jo buorre gielladáidu. Dasto dat oahpahit ja darvána earáide, illuda giellabeassebargi ja nubbi giellabálggiskoordináhtor Nina Hirvonen.
Hástalusat barggus dieđus leat, muhto ferte ohcat buriid čovdosiid, dadjá Hirvonen.
– Dathan lea hui dábálaš, ahte sámegielat bargit váilot vehá birra Suoma ja Sámi maiddái. Muhto jos mii oaččošeimmet juogalágan plána ja čovdosa dáinna giellabálggiskoordináhtoriid vehkiin.
Beaividuvvon 17.9.2025 diibmu 12.00: lasihuvvon video.
