Yle sámegielat mánáid tv-prográmma Unna Junná máhccá šearpmaide ođđa osiiguin vuossárgga 8.9. rájes. Prográmma sáddejuvvo vuossárggaid diibmu 8.35 Yle TV2 -kanálas ja Yle Areenas.
Dán čavčča rájes lea sámegielat mánáidprográmmaid ođđa buvttadeaddjin álggahan Katariina Guttorm. Son vuordá illumielain ođđa hástalusaid.
– Mus leamaš hui somá dát guokte vuosttas vahku. Leamašan gal hušša ja lean plánen vehá jo boahttevuođa, muitala Guttorm.
Son lea bargan ovdal ovdamearkka dihte Sajosa márkanastinhoavdan sullii ovcci jagi. Dan maŋŋá son lea geargan fitnat gazzamin oahpu Sámi oahpahusguovddáža medialinnjás. Dat movttiidahtii su ohcat mánáidprográmmaid buvttadeaddjin.
– Fuomášin, ahte mediasuorgi livčče munnje heivvolaš. Mus leat olu ođđa jurdagat ja idea, maid mun hálidan ollašuhttit ja lean hui hutkái, čilge Guttorm.
Son vuordá jo dan, ahte ođđa osiid govvemat álggášedje.
– Beasan deaivvadit ođđa olbmuiguin ja mánáiguin, ja áiggon vehá mátkkoštit dáppe Sámis ja bargat prográmmáid, muitala Guttorm.
Čavčča prográmmain beassat olggos ja stoahkat mánáiguin
Dán čavčča Unna Junnás oahpásmuvvat fáktabussá Vihmain, fitnat guolásteamen ja bigálusain. Šuokŋabiedju joatká musihkain ja animašuvnnain leat vuorddekeahtes ustitvuođat ja gádjundoaimmat.
– Unna Junná fitná maid Sámemusea Siiddas, lasihastá Guttorm.
Čavčča prográmmaid láidesteaddjit leat Xia Torikka davvisámegillii, Janica Gauriloff nuortalašgillii ja Sáárá Seipiharju anárašgillii.
Oktiibuot dán čavčča leat 15 oasi ja maŋimuš sáddejuvvo juovlamánus, muhto Guttorm lohpida ahte Unna Junná lassin leat earáge fálaldagat mánáide.
– Jáhkán, ahte mis šaddá earáge prográmma dan maŋŋá. Dat lea dušše Areenas, muhto soaitá leat vaikkoba juovlakalender boahtimin.
