Ijahis Idja -festivála čohkke fas olbmuid miehtá sámeguovllu Anárii návddašit musihkas, duojis ja servvoštallamis. Dán jagi Ijahis Ijas oaidnit earret eará Yungmiqu, Ella Marie ja Slincraze.
Slincraze nappo Nils Rune Utsi konsearta lea su vuosttaš ja vejolaččat maid maŋimus almmolaš konsearta dán jagi. Son oaččui bovdehusa boahtit loaiddastit festiválas, go Mollet-joavku ii beassange searvat festiválii.
– Lean bargan guhká musihkain, nu lean hárjánan konsearttaid doallat. Juste diet oassi gal ii leat dakkár mii suorggahii, lohká Slincraze
Konsertii Slincraze váldá maid boares lávlagiid, nu teavsttaid muitin ja lávlagiid hárjehallan leat barggahan.
Slincraze goargŋu lávddi ala lávvardaga ja loahpaha festivála. Son ieš lohká šaddat somá, go son lea vuosttaš háve lávddi alde guhkes áigái.
– Mun goit lohpidan, ahte mun galggan geahččalit loahpahit festivála hui suohttasit ja sávvamis mii beassat dánsut olu ja lávlut, lohká Slincraze.
Festiválaide dákkár prográmmarievdadusat leat dábálaččat. Ijahis Ijas maid leat várreplánat, jus prográmmii bohtet rievdadusat dahje juoga eará dáhpáhuvvá, muitala festivála veahkkebuvttadeaddji Aleksi Ahlakorpi.
– Gal dat jođánit dasto čielggai, daná lea gal buorre dilli ahte Sámis leat dievva buorit artisttat, ahte oažžu de dakkára gii lea lávvardaga maŋimuš artistan. Slincraze leat maid máŋgasat sávvan, dadjá Ahlakorpi.
Arvebiktasat fárrui Ijahis Idjii
Musihka lassin fállet maid earáge prográmma. Ijahis Ija olis leat fas duodjemárkanat, njoarostangilvvut, iešguđetlágan bargobájit mánáide ja nuoraide ja dáiddárdeaivvadeapmi. Sámi Duodji -searvi ordne maid ovdamearkka dihte duodjevuosttasveahkki, gos sáhttá fitnat divvumin ráhtasan sávnnji dahje luovvanan boalu.
Festivála ovttasbargoguoibmin lea Sámemusea Siida, gos ordnejuvvo luohtekonsearta ja gos beassá galledit festiválabileahtain, muitala veahkkebuvttadeaddji Aleksi Ahlakorpi.
Jus ii beasa báikki ala, de festivála sáhttá čuovvut maid ruovttus Sámi oahpahusguovddáža sádden njuolggosáddaga bokte. Arvvi dihte ii goit gánnet báhccit ruoktot geahččat njuolggosáddaga, jus heajos siivu deaivá vahkkolohpii, oaivvilda Ahlakorpi.
– Doppehan deaivá oahppásiid, máŋgasat dadjet ahte dát lea geasi maŋimuš áigi deaivvadit olbmuiguin miehtá Sámi. Áinnas arvejahkaid gánneha váldit fárrui, muhto galhan olmmoš dan gierdá. Ii leat vuosttas geardi, go Ijahis Ijas arvá.
