Guhkit áiggi bistán geassebáhkat áitet jo bohccuid heakka Roavvenjárgga dásis. Sámeguovllus báhkat eai goittotge hehtte seamma láhkai go lulit bálgosiin.
Lappi bálgosa boazoisit Nilla Hirvasvuopio muitala sin bálgosis leat vel govttolaš dilli báhkaid ektui.
– Mis lea vehá arván ja leamaš čoaskásut beaivvit. Bohccot leat beassan duohko áldá rávdii ja eará sajiide, doppe eai leat nu vearrás báhkat go guolbaniin. Mis ii vel dál leat heahti.
Avvila bálgosa boazoisit Niko Kustula muitala, ahte singe bálgosis bohccuin ii oro heahti, go dat besset duoddarii báhkaid báhtui.
Vaikko báhkat eai leat hehtten ilá sakka, leat boarut leamaš giksin Lappi bálgosis.
– Daiguin leat gal dáistalan. Vuos ledje olu čuoikkat ja dasto bohte vel boarut. Várra dat leat eanet hehtten bohccuid dáppe min guovllus go dát báhkat. Iihan daid beasa báhtui, manai gosa beare, dadjá Hirvasvuopio.
Báhkat leat ovdalge duššadan bohccuid
Nilla Hirvasvuopio lea gullan, ahte Soađegili lulábealde báhkat dagahit eanet váttisvuođaid. Dan nanne Poikajärvi bálgosa boazoisit.
– Dál dain lea duođai heahti. Leat aivve lahka dan, ahte jápmigohtetgo dat fargga, Roavvenjárgga davveoasis leahkki Poikajärvi bálgosa boazoisit Janne Mustonen dadjá.
Mustonen muitala, ahte bohccuid heajos dillái giddegohte fuomášumi jo badjel vahku dassái. Báhkka dálkkit leat bistán Roavvenjárggas dál 20 beaivve.
Mustosa mielde muhtin jápmán bohccot leat jo gávdnon, muhto jámut eai vealttakeahttá laktás báhkaide. Dat lea goittotge vejolaš, dasgo bohccot leat ovdalge jápmán seammasullasaš báhkaid áigge.
Maŋimuš measta seamma guhká bistán geassebáhkat ledje Lappis jagis 1972. Dalle oasis Poikajärvi bálgosa buot bohccot jápme, muitala Mustonen.
Mustonen muittuha, ahte bohccot leat árktalaš eallit, eaige dat leat hárjánan guhkes báhkaide. Báhkka dálkki lea daidda vearrát go 50 gráđa buolaš.
Einnostusaid mielde báhkat joatkašuvvet vel lávvardaga rádjái.
– Dás leat katastrofa ávdnasat, Mustonen oaivvilda.
