Ohcejoga čázádagas álgá maŋŋebárgga diibmu 19 golmma jándora luossabivdu.
– Dát lohpi guoská Ohcejoga ja Geavujoga. Dán golmma jándora áigge oažžu bivdit ovtta vuollel 65 sentte ditti, muitala Mika Aikio Deanu guolledoalloguovllus.
EJB-guovddáš, Meahciráđđehus ja eaktodáhtolaččat gohcet bivddu.
– Mis leat eaktodáhtolaš fávttat ja meahciráđđehusa iežas fávttat johtet Geavu ja Ohcejoga siste. Go luossabivdu rahppojuvvo moatti beaivái, de vehá viššalabbot fitnet jearahallamin lobiid. Hilbošit ii gánnet, dadjá Aikio.
Ohcejohkalaččat leat Aikio mielde vuolgimin buriin mielain bivdui.
– Vuhtto, ahte olbmot leat ráhkkanan ja buorre mielain beassá oba iskat bivdit luosa. Dathan gal leat movtta, čilge Aikio.
Čuvvot, ahte oktage ii váldde lobi haga luosa
Lappi EJB-guovddáža guollefákta Niilo Kalevi Länsman lea maid dan golmma beaivve áigge gohcimin Ohcejoga čázádaga guolásteami. Son muitala, ahte guollefákta geahččá, ahte guolástus dáhpáhuvvá njuolggadusaid mielde.
– Dán áigge luossa lea viehka vánet. Dál čuovvut, ahte oktage ii váldde lobi haga luosa.
Guollefávttat čuvvot vuosttažettiin dan, ahte olbmuin leat guollelobit ja sii bivdet lobálaš báikkiin.
Ohcejogas ja Geavujogas luosa bivdoáigi álgá 1.7.2025 diibmu 19 ja nohká 4.7.2025 diibmu 19.
Luosa oažžu bivdit dieid jogain stákkuin, firpmiin ja buođuin. Eará guliid oažžu bivdit stákkuin gitta borgemánu lohppii.
