Guovddášrihkuspoles ja Lappi rádjegozáhusa dutkan viiddis Davvi-Sámi rihkusráiddu dutkan lea ain gaskan, muhto dál dihtet, ahte dat lea earenomáš viiddis ollislašvuohta.
Dutkama vuolde lea opmodat-, ekonomiija- ja meahcástanrihkkosiid ráidu Davvi-Sámi guovllus. Rihkusnamahusat ovdadutkamis leat earret eará navdojuvvon roava ruhtabassan, roava suoládeapmi ja roava meahcástanrihkus.
Ságat-aviisa muitalii iežas gálduid vuođul, ahte dáhpáhussii laktásit boazosuoládeamit. Aviissa dieđuid mielde bohccuid leat njuovvan ja vuovdán Davvi-Suomas juo máŋga jagi, masa de laktásit boazosuoládeamit ja ruhtabassan. Aviissa dieđu mielde dáhpáhus guoská máŋgga bálgosa guvlui.
Dutkama jođiheaddji Teemu Mäntyniemi guovddášrihkuspolesis muitala, ahte norgalaš media ođđasis lea sáhka seamma rihkusollisvuođas, muhto son ii nanne dahje gomit aviissa čuoččuhusaid.
Mäntyniemi goit mieđiha,ahte guovddášrihkuspoles ii leat máŋgalogi jahkái dutkan vástideaddji opmodatrihkusollisvuođa Davvin.
Dáhpáhus ii laktás Anára boazosuoládemiide, man poles lea dál dutkamen ja mas dieđihedje mannan vahkus.
Guovttis fáŋgejuvvuiga
Poles ja rádjegozáhus dahke máŋga eiseváldeoperašuvnna mat laktásit dutkamii. Gittaváldimiid ja viessoohcamiid dahke geassemánu álggus Avvila, Anára, Ohcejoga ja Njávdáma guovlluin.
Dutkamiid gittaváldimiid oktavuođas fáŋgejedje guokte olbmo. Nubbi fáŋgejuvvui jáhkehahtti sivain roava ruhtabassamis ja roava suoládeamis. Nubbi fas fáŋgejuvvui jáhkehahtti sivain roava ruhtabassamis.
Fáŋgejuvvon olbmot leaba Mäntyniemi mielde luitojuvvon.
Guovddášrihkuspoles lea eiddo dál mannamen čađa bohtosiid ja materiálaid, maid lea čoaggán virgeoperašuvnnaid áigge Davvi-Sámis.
Sivva manne eai muital eanet, lea Mäntyniemi dieđu mielde dušše dat, ahte poles beasašii ráfis bargat áššiin.
– Poles háliida dál doallat ášši ná vai bastit dorvvastit dutkama. Dát lea rihkusdutkan dego earátge, muhto dál ášši háliidit doallat nu almmolaš dásis go vejolaš, vai oažžut dutkanráfi, Mäntyniemi lohká.
Dáhpáhusas sáhttet vejolaččat dieđihit eanet čakčat, jáhkká Mäntyniemi. Ovdadutkan lea ain álgomuttus ja vuos guovddášrihkuspoles ferte mannat materiálaid ja ášši buot beliid čađa, vai bastet oažžut ollislaš gova. Buohkanassii guovddášrihkuspoles dutká dáhpáhusaid sullii logi jagi áigodagas.
