Maiddái dán gease sáhttet olbmot ohcat Lappi EJB-guovddážis spiehkastatlobiid Detnui oahpahusa ja kulturdáhpáhusaid várás. Deanuluosa bivdogielddus lea fámus maiddái boahtte gease.
Diimmá gease Detnui mieđihedje spiehkastanlobiid vuođđodáluid oamasteaddjiide, fitnodagaide ja sámeservviide. Lappi EJB-guovddáš vuostáiválddii oktiibuot 30 sierralohpeohcamuša luossabivdui ja dalá spiehkastatlobiiguin olbmot ožžo bivdit badjel 50 luosa Deanus.
Spiehkastatlobit oahpahusa ja kulturdáhpáhusaid várás leat dárkkuhuvvon sámiid árbevirolaš bivdovugiid árbedieđu bajásdoallamii ja sirdimii buolvvas nubbái maiddái luossabivdogildosa áigge.
Lappi EJB-guovddáža jurista Elias Rauhala árvala, ahte dán jagi spiehkastatlobiid mieđiheamis lea čavgadut linnjá, go deanuluosa dilli lea hui heittot.
– Detnui gorgŋo diibmá 8500 deanuluosa, mii lea heittogamos lohku olles mihtidanhistorjjás, čilge Rauhala.
Rauhala árvala, ahte luossanáli dilli lea maiddái dán gease rašši ja danin sáhttá šaddat nuge, ahte spiehkastatlobiid eai mieđit oppanassiige.
Rauhala muittaša, ahte diibmá godde sullii 8 deanuluosa. Son lohká, ahte go spiehkastatlobi ohca deanuluosa bivdimii, nu dehálaš lea dat, ahte sáhka lea sámekultuvrras ja dan árbbi sirdimis ovddos guvlui.
– Mii eat leat eiseváldin álgán árvvoštallat dan, man láhkai sámekultuvra dulkojuvvo. Spiehkastatlobi mieđiheamis vuolggasadjin leat ohcamuša ákkat, Rauhala čilge.
Spiehkastatlobi sáhttá mieđihit dušše organisašuvnnaide ja ohcamušas ferte ákkastallat bivddu báikkálaš ja árbedieđu sirdima. Uhcimustá okta báikegotti olmmoš, geas lea bivdolohpi, ferte leat mielde bivdodáhpáhusas.
Spiehkastatlobiid sáhttá ohcat boahtte geasi várás 23.5.2025 rádjai.
