Árbevirolaččat luohti ja juoigan ii leat dárkkuhuvvon lávddi ala, dadjala multidáiddár Jalvvi Niillas, Niillas Holmberg. Son lea ieš mánnávuođa rájes beassan oahppat eará juigiin ja bargan musihkain.
Holmberg hálidivčče luđiid gullot fas árgabeaivvi eallimis dego dolin.
– Oluhan lea jo dahkkon. In dieđe livččengo munge dán bálgá alde, jus ii dalle 90-logus livčče leamaš jo ealáskahttinbargu. Ulla Pirttijärvi finai min luhtte go mii leimmet mánáidgárddis ja skuvllas, ja juoiggahii min.
Holmberg unohastá dan, ahte olbmot dán áigge orrot navdimin, ahte galgá leat artisttalaš čehppodat ahte sáhttá juoigat.
Gieskat ledje olbmot čoahkkanan deaivvadit luohteárbevieru namas Gáregasnjárgii. Deaivvadeamis olbmot besse háleštit juoigamis ja maiddái juoigat.
– Mii áigut háleštit luođi birra iešguđet geahččanguovllus. Erenomážit várra das, ahte makkár rolla luođis leamašan árbevirolaččat servodagas ja makkár dilli luođis lea otná beaivve. Ja makkár eallima mii hálidat luohtái, muitalii Holmberg ovdal luohtedeaivvadeami.
Ášši rašes bealis muitala olu dat, ahte luohtedeaivvadeami lágideaddjit sávve, ahte media ii čuovošii háleštallama iige govvešii go olbmot hállet ja vejolaččat juiget.
Buohkat eai velge dohkket juoigama, eandalit girkus
Badjelaš jahki dassái mánát cuiggohalle go áigo rohttestit luođi Sámi álbmotbeaivve kapeallas. Buohkaid mielas luohti ii heiven ordnejuvvon dilálašvuhtii, daningo kapealla lea bassi báiki. Mánát besse goittot maŋŋá juoigat Oulu bismagotti bisma Jukka Keskitaloi, go son galledii Gáregasnjárggas.
Loga lasi: Mánát eai beassan juoigat kapeallas, muhto bismá háliida gullat sin juoiggakeahttá báhcán luođi
Holmberg mielas dat muitala sápmelaččaid vássánáiggis ja das mo sápmelaččaid kultuvra lea gáržžiduvvon. Son ieš goittot liiko juoigat girkus buorre akustihta dihte.
– Dat lea cieggan min beljiid gaskii dakkár jurddašeapmi, ahte luohti ii heive dihto birrasiidda. Dieđus leat iešguđetlágan jurdagat olbmuiguin ja dan maid ferte gudnejahttit.
Juoiganárbevieru galggašiige ealáskahttit dábálaš árgabeaivválaš doaimmain, árvala Holmberg.
– Vai luohti galgá gullot, de galgá juoigat. Ja juoigat namalassii lávddi ja studio olggobealde árgabeai deaivvademiin.
