Mannan vahkuloahpas, Eanodaga Bievrrašjávrri guovllus golbma mohtorgielkávuoddji vuojihedje bohccuid guotteteatnamis.
Čorragis ledje maiddái ruksesmiesit, mat aidd'al de čuoččat bisso.
– Galhan dat dieđusge suhttadii ja šattai maid moraš, muitala Neakkela bálgosa badjeolmmoš Marko Ranta.
Ranta siidaguoibmi guorai luottaid ja fáhtii vuojašeaddjiid. Ranta muitala, ahte sin guovllus ii leat ovdal dáhpáhuvvan dákkár ráfehuhttin guottetáigge.
– Eai dat leat beroštan masge maidige. In máhte sin motiivva dadjat, imaštallá Ranta.
Badjeolbmot dahke lávvardaga bolesii rihkusalmmuhusa dáhpáhusas. Boazodoalloláhka gieldá bohccuid ráfehuhttima ja lága rihkkumis sáhttá sáhkohallat.
Ranta deattuha, ahte vahkuloahppa dáhpáhus lei spiehkastat. Olbmot gal dávjá jerret sis gos bohccot guhtot ja oažžugo doppe johtit.
Jus áldduid ráfehuhttá, dat sáhttet reitot, dahje guođđit ruksesmiesi
Eandalii turismabáikkiid lahkosis lea lassánan mohtorgielkkáin vuojašeapmi ja dat dagaha hehttehusaid boazodollui, dadjá Bálgosiid ovttastusa doaimmajođiheaddji Anne Ollila.
– In muitte, ahte livččen ovdal gullan áldoealu siste vuojašeamis. Orru gal leame jallas hommá, imaštallá Ollila.
Bálgosiid ovttastus lea viggan dieđihit das, makkár hehttehusaid gielkkáin vuojašeapmi dagaha boazodollui.
Ollila mielde meahccejohtolaga gohcimii leat menddo unnán resurssat. Bearráigeahččama sáhtášii vejolašvuođaid mielde lasihit dakkár guovlluide, gos vuojašeapmi lea stuorát čuolbma, jurddaša Ollila.
Guottetáigge badjeolbmot vigget iežage garvit dušši johtima guottetguovllus. Ranta sávvá, ahte bohccot bállešedje dás ovddosguvlui ráfis guoddit.
– Nuorra álddut guđđet misiid álkit, jus daid ráfehuhttá dahje vuojiha. Bohccot ruhtte gáláhagas. Dalle álddut sáhttet reitot dahje lápmašuvvat.
