Sámi Giellagáldu lea normeren ođđa sámegielat smiŋkensániid. Dán rádjai smiŋkensániide leat ieš geksen tearpmaid dahje geavahan eaŋgalasgielat sániid.
Anárlaš nuorra Sáranne Näkkäjärvi mielas daid ođđa sániid sáhttá gal oahppat, muhto dat lea veháš váddát.
– Dat leat vehá váddásat ja dakkárat maid in leat ovdal gullan. Mun sáhtášin daid geavahit go fal muittán daid, dadjá Näkkäläjärvi.
Sámi giellagáldu davvisámegiela bargi Sierge Rasmus árvala, ahte ođđa sánit orrot apmasat jos daid ii leat goassige ovdal gullan.
– Jos mii nu ii oro duođas heivemin, de dieđusge dain sáhttá sáddet midjiide máhcahaga, ávžžuha Rasmus.
Rasmus muitala, ahte Sámi giellagáldus sii sáhttet árvalit makkár sániid sáhttá geavahit, muhto giellasearvvuš ieš mearrida maid váldá atnui ja maid dat dohkkeha.
Normerejuvvon sánit biddjojuvvojit neahttasátnegirjái. Giellagáldu geahččala juohkit dieđu ođđa sániin dán áigge eanet maid sosiálamedias.
