Báišduoddara guovllus jagis 2020 dahkkon boazosuoládemiid sivahusvihkkehallan lea gárvánan. Guovloalaguoddi lea áššáskuhttán golbma olbmo ovttas dahkkon roavis suoládeamis ja roavis vearisteamis.
Eahpiduvvon dagut leat dahkkon Ohcejogas 1.3.–2.5.2020. Áššáskuhtton olbmot leat ovdadutkama áigge mieđihan oasi daguin.
Stevdnenohcamuš lea doaimmahuvvon Lappi gearretriektái golggotmánu 16. beaivve 2024. Stevdnenohcamuš lea almmolaš, go ášši lea gearretrievttis.
Duogáš: Máŋggalogi bohcco mearkkat rievdaduvvojedje
Báišduoddara bálgosis gávdne jagi 2020 gárddástallamiid oktavuođas olu bohccuid, maid mearka lei rievdaduvvon.
Boles dutkagođii boazosuoládemiid Báišduoddara bálgosis giđđat 2020. Dalle Lappi boles dieđihii, ahte sii dutket roava boazosuolavuođa ja vearistanrihkkosa Báišduoddara bálgosis. Seamma oktavuođas namuhedje maid, ahte dutkan guoská mearkkašahtti stuorra opmodaga suoládeami.
Boles lea dieđihan boazosuoládemiin mannan háve čakčamánus 2023. Báišduoddaris dutke máŋggalogi bohcco mearkka rievdadeami. Mearkkaid navde lean rievdadan nu Suoma go Norgga beale bohccuin.
