Váldostivrra nubbi várreságadoalli Pekka Heikkinen (olgeš) lea suoidnemánu loahpas áššáskuhtton illasteamis ja virgevásttu rihkkumis. Soađegili gielda lea ožžon áššis dieđu easkka borgemánus 21. beaivve.
Gielddaráđđehus lea gieđahallan ášši vuossárgga 4.9.2023. Gielddaráđđehus evttoha váldostivrii, ahte Heikkinen bidjet eret nuppi várreságadoallibáikkis dakkaviđe.
Yle Sápmi fáhtii Heikkinen telefovdnii.
– In sáhte kommenteret ášši, mii lea gaskan. Oasálasttán vuossárgga váldostivrra čoahkkimii, dadjá Heikkinen.
Soađegili gielddahoavda Jari Rantapelkonenge ii kommentere ášši.
Gieldalágas čuožžu, ahte jus luohttámušolmmoš lea áššáskuhttojuvvon ja alaguoddi gáibida su ráŋggáštuvvot, de dalle váldostivra sáhttá bidjat su eret luohttámušdoaimmain ja vuordit dassái go duopmu celkojuvvo.
Yle muitala nama jo dán muttus vaikko duopmu ii leat vel celkojuvvon. Yle ákkastallá nama muitaleami dainna, ahte sáhka lea gieldda njunuš politihkkáris ja mearkkašahtti válddi geavaheaddjis Soađegili gielddas.
Pekka Heikkinen lea válljejuvvon gielddaválggain 2021 Soađegili váldostivrii. Váldostivra válljii su geassemánus váldostivrra nubbin várreságadoallin badjái 2023-2025. Heikkinen lea čohkkán máŋga baji Soađegili váldostivrras njunuš doaimmain.
Soađegili gielddaráđđehusa áššelisttus oaidná dán ášši gieđahallanbáhpára.
Ášši beaividuvvo.
Lasihuvvon Heikkinen kommeanta 5.9.2023 dii. 11:25.
