Deanu soahpamuša Suoma ráđđádallangotti ohcejohkalaš lahttut vuostálaste Deanu soahpamuša.
Ráđđádallanbohtosis gárte jienastit ja jienasteami boađus lei 4–4.
Sáttagotti ohcejohkalaš lahttut guđđe sierraoaiviliid mearrádussii. Dát dárkkuha, ahte sii čálihedje beavdegirjái virggálaččat, ahte sii eai čuoččo mearrádusa duohken.
Soahpamušas mearriduvvui gaskavahku
Suoma ráđđádallangottis čohkkajit njeallje lahttu ministeriijas ja njeallje báikkálaččaid ovddasteaddji earet eará Sámedikkis ja sápmelaš fitnodatdoalliid searvvis (Saamelaismatkailu ja yrittäjät ry).
Deanu oasusgottiid ovddasteaddji Anne Nuorgam muitala, ahte Deanu soahpamušas mearriduvvui mannan vahku gaskavahku.
Soahpamušhámus almmustahttojuvvui odne duorastaga.
Deanu ođđa soahpamuša ulbmilin lea geahpedit goddon luosaid meari 30 proseanttain dálá dásis. Dán dihte bohtet ođđa ráddjehusat buot bivdovugiide.
"Sierraoaivilat beavdegirjái"
Oktage báikkálaš ii sáhttán dohkkehit soahpamuša, mii ráddje bivddu garrasit, muitala Anne Nuorgam.
– Go soahpamušas mearriduvvui, nu buot báikkálaš ovddasteaddjit guđđe beavdegirjái sierraoaivila.
– Bohtosa mearridii ságadoalli Pentti Lähteenoja jietna. Son lea maid ministeriija ossodathoavda, Nuorgam muitala.
Álbmot ortniiduvvamin soahpamuša vuostá
Ohcejogas leage álbmot ortniiduvvamin Deanu soahpamuša vuostá.
– Ohcejogas lea šaddamin álbmotlihkadus Deanu guolástannjuolggadus- ja soahpamuševttohusa vuostá, muitala Ohcejoga gielddahoavda Vuokko Tieva-Niittyvuopio.
Soahpamušhápmosa sisdoalus ordnejuvvojit dieđáhus- ja háleštandilálašvuođat Ohcejogas ja Gáregasnjárggas.
Ohcejoga Áilegasdálus ordnejuvvo dilálašvuohta duorastaga 7.7.2016 diibmu 16.00 ja Gáregasnjárgga Gilidállu Sáivus bearjadaga 8.7.2016 diibmu 16.00.
