Ohcejogas lea álbmot ortniiduvvamin Deanu soahpamuša vuostá.
– Ohcejogas lea šaddamin álbmotlihkadus Deanu guolástannjuolggadus- ja soahpamuševttohusa vuostá, muitala Ohcejoga gielddahoavda Vuokko Tieva-Niittyvuopio.
Deanu soahpamušhámus almmustahttojuvvui odne duorastaga.
Ođđa soahpamuša ulbmilin lea geahpedit goddon luosaid meari 30 proseanttain dálá dásis. Dán dihte bohtet ođđa ráddjehusat buot bivdovugiide.
Dilálašvuođat Ohcejogas ja Gáregasnjárggas
Soahpamušhápmosa sisdoalus ordnejuvvojit dieđáhus- ja háleštandilálašvuođat Ohcejogas ja Gáregasnjárggas.
Ohcejoga Áilegasdálus ordnejuvvo dilálašvuohta duorastaga 7.7.2016 diibmu 16.00 ja Gáregasnjárgga Gilidállu Sáivus bearjadaga 8.7.2016 diibmu 16.00.
– Dilálašvuođas evttohusa birra addá dieđu ráđđádallangotti lahttun doaibman Anne Nuorgam ja báikki alde leat luohttámušolbmot Ohcejoga gieldda ovddasteaddjin, Tieva-Niittyvuopio muitala.
Soahpamušhápmosis beassá vel cealkit ovdalgo dat manná riikkabeivviid dohkkeheapmái.
