Deanu luossadilli lea ságastahttán obmuid dál sihke Norggas ja Suomas. Ohcejohkalaš fierbmebivdi Niilo Aikio muitala, ahte luossajagit leat sierraláganat, luosa mearri rievdá jagis jahkái.
– Jus muhtin jagiin ledje veahá unnit guolit, go dábálaččat de dat lei áibbas lunddolaš dalle maiddai, nugo dálge. Dál ii leat nu olu guolli go daid ovddit jagiid. Ovddit jagi lei earenomáš buorre guollegeassi ja earenomáš olu dittit nugo deanodittit, muhto dál deanoditti lea vanas goittot mu guovdu leamašan. Dat lea áibbas dábálaš, ahte ii jahki leat jagi viellja, muitala Aikio
Sápmelaččat leat doallan Deanu buori ortnegis
Niilo Aikio dadjá, ahte sápmelaččat leat doallan Deanu nu buori ordnegis ja Norggas ja Suomas galggalege leahkit giitevaččat sápmelaččaide. Aikio maid muitala, ahte luosat bohtet máŋgii gođđat Detnui.
– Go dál lea boahtimen, dahje geavvamen dat Deanu bivdonjuolggadusráđđádallamat Norgga ja Suoma gaskkas ,nu eai gal galggaše šat álgit min vašuhit ja min viggahit gáddái, ahte dainna mielain, ahte mii dat leat dat geat dan deanu guollenáli duššadit. Gal dat ožžot Norgga ja Suoma bealde leat das giitevaččat midjiide sápmelaččaide ahte mii leat dán Deanujoga doallan ná buori ortnegis vel dánge rádjai. Dat luosat mat dáppe leat dat gođđet ja mannet fas merrii ja bohtet máŋgii gođđat deike, dadjá Aikio.
Earenomáš luossajohka, gosa maid eará guovllu olbmuin lea vejolašvuohta boahtit
Deatnu lea earenomáš luossajohka ja eará guovllu olbmuin maid lea vejolašvuohta návddašit das, muhto sii galggale fuomášit ahte sii leat guossit, eai isidat, dadjá Aikio.
– Gal mii leat earenomáš luossajohkagáttis gal dáppe orrut ja navddašit. Addit maiddai vejolašvuođa eará guovllu olbmuide boahtit navddášit, muhto gal dat galget dan gal fuomášit, ahte sii leat guossit, eai dat leat isidat nu mot dal dábálaččat vigget leat, dadjá fierbmebivdi Niilo Aikio.
