Deanu guolástansoahpamuša ráđđádallangotti várrelahttu Nilla Tapiola ii vel otnábeaivve jáhke, ahte ođđa Deanu soahpamuš ii ollašuvašii.
– Mis lea leamašan dáppe Deanujogas dan láhkái ahte mii leat ožžon dienu rájahis joga suhkat, ja goappat bealde rája oaggut. Jos livčče nu ahte ii boađáše dat soahpamuš, masa mun in vel otnábeaivve jáhke, de dallehan dat šattašii dakkár dilli ahte doppe livččii čielga oalli Deanujogas man oali rastta ii oaččosii mannat oaggut. Ja dasa mii leat dieđusge jo báikkálaš dásis hárjánan. Ja lean maid lean gullan kommeanttaid sihke Norgga ja Suoma bealde, ahte dan dillái mii eat galggaše gártat.
Tapiola muitala, ahte oktage mearrádus ii leat vel dahkkojuvvon, vaikko ráđđádallangoddi lea leamašan čoahkis jo guokte jagi.
– Na oačču lohkat ahte dat ráđđádallamat eai leat vel mange muttus, ahte dat ráđđádallangoddi lea leamaš čoahkis guokte jagi dán rádjái, ja ii oktage mearrádus leat dahkkojuvvon. Ja doppe leat dieđusge dakkár dihto áššit main eat leat beassan vel albma láhkai ráđđádallatge, ja okta lea dieđusge dakkár ahte Suoma bealde lea hirbmat dehálaš dat turismaguolásteapmi, ja dain evttohusain mat dál leamaš beavdde alde, measta beliin lea leamaš nu ahte dan galggašii unnidit, ja dasa mii eat dieđusge nu hirbmat mielas leat.
– Ja de lea maiddai dakkár fierbmebivdu, árbevirolaš bivdu. Dohko lea maid evttohuvvon garra ráddjehusat, ja datge orrot leamen dakkárat ahte mii eat leat vel sáhttán goittotge daid dohkkehit dakkárin go dat leat bukton beavdde ala.
Eai leat ráđđádallan seamma beavddi birra
Nilla Tapiola oaidná, ahte jos soahpamušas livčče ráđđádallan seamma beavddi birra, soahpamuš sáhtášii leat jo fámus.
– Ja dat mii dán ráđđádallankultuvrras lea earru maid ovdal lea leamaš, lea dat ahte mii eat leat rievtti mielde beassan seamma beavddi birra háleštallat. Dat leat dušše báhpárat boahtán, ja midjiide lea ovdanbuktojuvvon ahte dat leat dákkár ja dakkár evttohusat, ahte eat leat albma láhkai beassan dáppe ráđđádallatge. Dat lea várra mielddisbuktán maiddái dan, ahte eat ovttage mearrádusa leat beassan dahkat dán guovtti jagis.
– Mun oainnán dan láhkái, ja mii leat háleštallan maiddái dain ráđđádalliiguin, ahte jos dat livččii leamašan mahkáš nu ahte dat livčče báikkálaččat gevvojuvvon dat ráđđádallamat, de mis livččii jo várra soahpamuš fámus, dadjá Tapiola.
