BB-Ándte áhčči Ándde Ovllá Juuso illuda, go Suomasge lea sápmelaš mielde nu gohčoduvvon duohta-tv-prográmmas. Juuso namuha, ahte Norgga Farmen-nammasaš duohta-tv-prográmmii moadde jagi dassái oassálastán sápmelaš Mikkel Isak Eira iešalddes vuittii olles gilvvu.
– Andte lea vuosttas sápmelaš. Ahte dakko lea goit oalle somá. Dathan humai sámegiela sotnabeaivvi vuosttas prográmmas, mas bukte su ovdan. Lei somá maid gullat sámemusihka, Intrigue, mii čuojai go son vázzii sisa BB-vissui. Dat lea somá go mielde lea sápmelaš. Oainnat Norggas leamašan Guovdageainnu sápmelaš mielde Farmen-prográmmas ja bures dat goit birgii bures, go dathan vuittii, Juuso dadjá.
Juuso vuordá oaidnit makkár gilvvuid viesu ássiide lágidit.
– Galhan doppe váhtet muhtun bargguin čehppodaga ja jierpmi ja vuoimmi, doaivvun goit.
Áhčči sávvá, ahte Andte beassá leat goittot moadde vahku mielde gilvvus, jos fal ieš hálida.
– Somá jos oanehis áiggige bisulii doppe. Go livčče goit muhtin vahku, de livčče somá oaidnit. Dat lea váivi jos heti čievččastit olggos. Muhto dat lea vuolgán jo dieinna mielain, ahte ii leat ihan bággu, vuolgán dego geahččalit. Somá oaidnit movt dat de manná. Dieđusge jos ii hálit doppe leahkit, go dashan dat vuolgá, ahte hálida leat doppe ja mo orru golaheamen áiggi.
Áhčči lea rávven bártnis ovdal vissui lávkema
Mo gáttát, go olbmot gártet dieppe dálus leat ovtta sajis eaige beasa olus eará sajis fitnatge?
– Diet lea dieđusge vehá. Muh gal dat sámi olmmošhan lea hárjánan, go dálki deaivvida, ahte šaddá vahku leahkit ovtta sajis. Ii beasa olggosge. Seamma dat dieppe lea, gal dat hárjánit. Mun lean neavvun ferte jurddahallat dat lea dakkár dálki. Iihan gánnat gosage vuolgit.
Mo dat orru, ahte tv-kamerat čuvvot measta juohke sadjái?
– Gal dat lea ožžon rávvagiid, ahte doppe ii galgga. Gal dat diehtá dat fáktejit juohke sajiin gal. Dat dat galggalii bissut mielas, ahte doppe leat govvenaparáhtat mat govvejit čađat.
"Geahččá vuos mo sápmelašvuođa heive buktit ovdan"
Andte Gaup-Juuso muitala aviisajearahallamis, ahte ii áiggo dađi eanet buktit ovdan iežas sápmelašvuođa.
– Mu mielas dát lea persovnnalaš gilvu. Mun lean sápmelaš ja boazoolmmái, muhto BB-dálus lean dušše Andte Gaup-Juuso.
Áhčči Ántte-Ovllá Juuso árvala, ahte Andte geahččá vuos mo sápmelašvuođa heive buktit ovdan.
– Dat ferte doppe geahččat ja oaidnit máinnalágiin. Muhtun sajis sáhttá sápmelašvuođa buktit ovdan vaikke luđiin. Dat lea juoigan muhtin doaluin dego NRK Sámi luohteprográmmas Heahtas, mii sáddejuvvui radios.
– Suohpana galggai váldit mielde vai beassá njoarostallat. Jos nie nai guhkes áigái báhcá dohko, de ferte juoida leat áigegollun, Juuso árvala.
Guldal Ántte-Ovllá Juuso olles jearahallama Yle Areenas!
