Anáraš Jouni Aikio, dehe Haikonen nugo su dovdet maid, mielas lea váivi, ahte muhtin olbmot sivahit davvisápmelaččaid olgguštit eará sámejoavkkuid. Son čálii moadde vahku dassái oaivilčállosa ášši birra Lapin Kansa -áviisii.
Aikio hálidii muitalit iežas oaivila dan maŋŋá go olgguštanságat beaggigohte medias.
- Áviissain álge oidnot bajilčállagat ja juobe radios gieđahalle ášši muhtin muttus dan, ahte davvisápmelaččat olgguštivčče anársápmelaččaid.
"Beaivválaččat mii leat dahkamušas davvisápmelaččain"
Aikio dadjá, ahte son ii dovdda iežas olgguštuvvon. Meahcis go johttá ja boazobargguin, de ovttas doppe sápmelaččat barget eaige olgguš nuppiid.
- Mun dan dieđan áibbas sihkkarit, ahte meahcis gos mii johttit, ii eanaš olbmuin oba jáhkege diekkár olgguštanságaid. Measta beaivválaččat mii leat dahkamušas davvisápmelaččain ovdamearkka dihte bigálusain.
Ságastallan ášši birra lea duoldagoahtán liiggás, oaivvilda Aikio. Dál galggašii muitit olmmošvuođa iige fierrut menddo sakka.
Guldal olles jearahallama bearjadaga Bures ain -sáddagis (suomagillii).
