Ulla Pirttijärvi-Länsman juoiggai Ubmi kulturoaivegávpotrahpamis mannan lávvardaga.
Ubmi eurohpalaš kulturoaivegávpotjahki rahppojuvvui stuorra Buolli muohta -nammasaš show'ain, man temán ledje earret eará sámi gávcci jagiáiggi.
Pirttijärvi-Länsman lassin rahpamis juoiggaiga Iŋgá Juuso ja Sofia Jannok. Åsa Simma fas logai divttaid sáme-, ruoŧa- ja eaŋgasgillii ja Ola Stinnerbom dánssui. Show's ledje sin lassin mielde logit dánsut ja čuojaheaddjit.
Victoria rabai virggálaččat
Ruoŧa kruvnnaprinseassa Victoria rabai Ubmi kulturoaivegávpotjagi virggálaččat show'a loahpas. Riga Latvias lea dán jagi nubbi eurohpalaš kulturoaivegávpot.
Buolli muohta -rahpanshow'a sáhttá geahččat maŋŋelgihtii interneahtas sámegiel dahje ruoŧagiel kommeantarain. Jenny Israelsson Skoglund ja Marja Påve lágideigga sáddaga interneahtas.
