Alimus hálddahusrievtti duomu mielde Gálddoaivvi bálggus ii livččii ožžon lohkat čearpmahiid bigálusaid olggobealde, muitala Lapin Kansa -aviisa.
Gálddoaivvi bálgosa giđđačoahkkin lei jagis 2018 lohkan jagi 2017–2018 boazolohkui golmma iešguđet olbmui oktiibuot 21 čearpmaha. Duoddaris dahkkon lohkamii ledje oassálastán máŋggas, maiddái boazoisit.
Bálgosa dieđuid mielde čearpmahat eai lean mielde ovddit čavčča eaige njukčamánu bigálusain, muhto dat ledje ihtán olbmuid ellui maŋŋelis. Bálggus eahpidii, ahte čearpmahiid ledje buktán eará sajis. Seammás ledje fuomášan earálágan guolgamearkkaid ja varas bealljemearkkaid.
Dáid dáhpáhusaid maŋŋá Lappi gearretriekti attii skábmamánus 2020 duomu, mas Gálddoaivvi bálgosa golbma badjeolbmo dubmejuvvojedje behttosa geahččaleamis, go ledje buktán bohccuid lobi haga bálgosii. Roavvenjárgga hoavvariekti goittotge gomihii Lappi gearretrievtti mearrádusa ođđajagimánus, go áššis bázii čájetkeahttá, ahte bohccuid livčče buktán nuppi bálgosis Gálddoaivve bálgosii.
Sivahallon olbmot váide hálddahusriektái bálgosa meannudeami bohccuid lohkamis. Lapin Kansa -aviissa dieđuid mielde hálddahusriekti gávnnahii borgemánus 2020, ahte čearpmahiid ledje lohkan luohtehahtti vuogi mielde. Dán mearrádusa váide njealjis ja sis golbma ledje olbmot, geaid nammii bohccuid ledje duoddaris lohkan. Váidit dadjet, ahte vuolggasadjin ferte leat dat, ahte bohccuid lohkama dahket oktasaš bigálusain.
Dál AHR gomihii hálddahusrievtti ja bálgosa mearrádusaid ja máhcahii ášši bálgosii gieđahallanláhkai.
AHR: bálggus ferte meannudit ovtta- ja dásseveardásaččat
AHR oinnii ášši nu, ahte boazolohkui lea vejolaš lohkat bálgosa guovllus gávdnon logakeahtes bohccuid, mat eai leamaš gárddis, ovdal boazojagi loahpa. AHR ja hálddahusriekti guktot gehčče dilálašvuođa dakkárin, ahte bohccuid lohkan duoddaris lei vejolaš luohtehahtti vugiin.
Jus bohccuid lohket duoddaris, de AHR oaivila mielde bálggus ferte leat sihkkar, ahte meannudit ovtta- ja dásseveardásaččat. Dán geažil bálgosa čoahkkin sáhttá dohkkehit prinsihpaid, maid vuođul bohccuid lohkan bigálusaid olggobealde leamašan vejolaš. Dákkár prinsihpain eai goittotge lean soahpan.
AHR oinnii, ahte ovttaveardásašvuođa gáibádus livččii gáibidan dan, ahte olbmot, geaid nammii bohccuid ledje lohkan dahjege sin ovddasteaddjit, livčče leamašan báikki alde. Danin bohccuid lohkan ii lean dáhpáhuvvan boazodoallo- ja hálddahuslága eaktudeaddji, luohtehahtti vuogi mielde.
Beaivvi ságaid ja Yle Ođđasiid Sámis sáhtát maid guldalit Yle Areenas.
