Mõõnni neäʹttli Čeʹvetjääuʹr vuuʹdest lie leämmaž jiânnai huušš, määŋg oummu da jõnn tobddmõõžž, ku toʹben leät eʹpet fiʹlmmjam Katja Gaurilooff Jeʹvida-fiiʹlm. Maaiʹlm vuõssmõs nuõrttsääʹmǩiõllsaž fiktiofiiʹlm fiʹlmmjem lij ååʹn puuttâm da lij mâʹŋŋtuâjai vuârr. Fiʹlmm õõlǥči leeʹd vaalmâš rosttovmannust, leâša vuõssjeäʹǩǩää âlgg võl vueʹrdded siõmmna kuuʹǩǩben.
– Fiiʹlm Lääʹddjânnam vuõssjeäʹǩǩääž lij ǩeâđđa 2023. Meeraikõskksaž vuõssjeäʹǩǩää õhtt vuäittmõš lij Berliin fiʹlmmfestivaal täʹlvvmannust 2023, mušttal Jeʹvida-fiiʹlm puuʹtʼteei Joonas Berghäll Oktober-puuʹtʼtemõutstõõzzâst.
Ǩiõll, kulttuur da fiʹlmmjempääiʹǩ leʹjje sääʹm čuäjtõõlʼjid tobddâz, leâša čuäjtõõllmõš oođâs
Jeʹvida-fiiʹlmest čuäjtâʹlle nuʹt lääʹdd ämmatčuäjtõõli ku še sääʹm oummu, koin ij leämmaž ǩiõččlâsttmõš čuäjtõõlli tuâjast. Heini Wesslin čuäjtââll fiiʹlmest Jeʹvida jieʹnn.
– Vuõssmõs vuâra mon pieʹssem vueiʹnned, mäʹhtt fiʹlmm lij rajjum. Lij leämmaž hääʹsǩ da miõllǩieʹssi leeʹd mieʹldd täʹst.
Jieʹnn rool da sääʹmǩiõl mainstummuš leʹjje Wessliiʹne tobddâz juʹn jiijjâs jieʹllmest. Jieʹnn čuäjtõõllmõš sääʹmǩiõllsaž fiiʹlmest leäi kuuitâǥ oođâs suʹnne.
– Kâʹl tät lij leämmaž vaiggâd. Leäm mättjam jiânnai, särnn Wesslin.
Matleena Fofonooff rool fiiʹlmest lij Jeʹvida äkk.
– Muu miõlâst tät lij leämmaž hääʹsǩes rool, ku tät lij mij kulttuur da ǩiõll.
Fofonooff mieʹldd leäi hiâlpp čuäjtõõllâd sääʹm fiiʹlmest. Fiʹlmmjempääiʹǩ-i leʹjje juʹn tobddâz suʹnne.
– Ij taarbâž čuuʹt čuäjtõõllâd, ku puk lie toobdâs ääʹšš, tuâtt Fofonoff.
Fiiʹlm maainâs nårrai Katja Gaurilooff sooǥǥ mainnsin da saaʹmi ǩiõččlâsttmõõžžin
Jeʹvida-fiiʹlm maainâs lij Katja Gaurilooff toʹlǩǩeem mainnsin, koid son lij kuullâm jieʹllmes ääiʹj ruåđines.
– Vueʹzz fiiʹlm mainnsin muu jeäʹnn lij peäggtam muʹnne pärnnpooddâs pirr. Lââʹssen lie võl jiijjan miõlljurddi.
Fiiʹlmest uʹcc Jeʹvida-nijdd saǥstââll suu jäämmam ääʹjjin. Mâʹte fiiʹlm vueiʹvvooumaž, Gaurilooff jeäʹnn še lij jeällam kueʹllšeeʹllmen ääʹjjines.
– Ku äʹjj jaaʹmi, jeäʹnn õõlǥi vueʹlǧǧed škoouʹle. Vuåǯǯum alggveärlaž jorddmõõžž fiʹlmme tõʹst.
Fiʹlmm ij kovvâd tåʹlǩ Gaurilooff sooǥǥ, peʹce puk Lääʹddjânnam säʹmmlai ǩiõččlâsttmõõžž.
– Määŋg ääʹšš fiiʹlmest lie tobddâz pukid säʹmmlaid. Mâʹte tõt, što mäʹhtt aazztõkškooulääiʹj lie vaikktam päärnaid da mij ânnʼjõž jieʹllma.
Čuäjtõõllʼjivuiʹm lij mainstum säʹmmlažvuõđ da saaʹmi historia pirr.
– Tõk ääʹšš lie ǩiõttʼtõllum juʹn ääiʹjben. Fiʹlmmjempoodd mij leäʹp čiŋlmõõvvâm tuejjeed fiiʹlm mainnâz jieʹlled kamera ooudâst, ceälkk Gauriloff.
Looǥǥ lââʹzz:
Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.
