Sääʹm-museo Siida jåått ââʹn tän ǩiiđ pirr Sääʹm, da oummid tuäivat mieʹldd viikkâd ooudâs sääʹm-museo tååimaid da tobdstõõttâd ođđ norldõõǥǥid. Vuõssmõs kaaunõõttmõš leäi Čeʹvetjääuʹrest, koozz museo leäi pohttam čeʹvetjäuʹrrniiʹǩǩid vueiʹnnemnalla vuäʹmm snimldõõǥǥid.
Tuejjan leäi tobddâd muâđaid. Čeʹvetjäuʹrrneǩ Nykänen Eevast ij mõõnnâm kuuʹǩǩ, ko son hoʹhssji, ǩeäk tobddâz snimldõõǥǥin leʹjje.
– Muäʹdd avi leäi-ǥo kolmm snimldõõǥǥâst leʹjjem jiõčč. Ǩiõʹččem vuõi vuõi, mon leäm leämmaž tääiʹben siõm niõđâž, koolmekksaž avi viiđekksaž. Jiõm muuʹšt, leâša hääʹsǩ leäi ǩiõččâd jiijjan teʹl, ko leäm leämmaž siõmâž.
Museotuâjast obb sääʹmmeer äʹšš
Museopedagoog Milla Pulska feʹrttji põõššâd Nykänen mieʹldd, ko ǩeeʹrjti snimldõõǥǥin käunnʼjam oummui nõõmid pââjas.
– Leäi hääʹsǩ vueiʹnned, ko oummu ǩiõʹčče snimldõõǥǥid da toʹbdde oummid tõin. Leʹjje kaunnâm jiijjâz še tõin. Tät leäi hääʹsǩes mäʹtǩǩ historiaaʹje õõutâst sijddoummivuiʹm, mušttal Pulska.
Ko Aanar sääʹm-museo Siida teevat da veeideet, šâʹdde museotuõjju ođđnallšem õhttsallaš tuâj õõutâst säʹmmlaivuiʹm. Näkkam sijddjååttmõõžživuiʹm tän tuâj altteet.
– Meeʹst lie määŋg neäʹttel jååttmõš ooudpeäʹlnn, juõʹǩǩ neäʹttel ođđ päiʹǩǩ, koozz mij mõõnnâp. Lij tuõđi fiinâs jååʹtted da teivvad oummivuiʹm da puʹhttep še uʹcc vueʹzz norldõõǥǥâst mij mieʹldd, mušttal Pulska.
Siida haaʹlad puʹhtted museotååim âʹlddlab säʹmmlaid da pohtt mieʹldes še museotäʹvvrid vueiʹnnemnalla. Sääʹm-museooʹje maaccteš mõõnni čõõuč jiânnai saaʹmi vuäʹmm täʹvvrid, kook jie leäkku ouddâl leämmaž vueiʹnnemnalla.
Måttam õõmâs täʹvver leʹjje da tõt šõõddii jiânnai tobddmõõžžid.
– Čuuʹǩǩ ko ääʹvee, mon aivv tuäʹrjstem. Čââʹđ aaʹlji njoikkad siõmmna. Sõrgg jiõm tuõsttâm liikktõõllâd, mâŋŋa täʹst vaʹlddem jiõccsan, hääʹsǩ leäi tõid ǩiõččâd da ǩiõđi seʹst tuõʹllʼjed, mušttal Eeva Nykänen.
Puõʹtti neäʹttel jåʹtte nuõrttjest Jeännõʹǩǩe
Sámi Soster rõ da sääʹm-museo jåʹtte pirr Sääʹm ǩiiđ ääiʹj. Puõʹtti neäʹttel sij lie Jeänõõǥǥâst, koʹst kaaunõõttmõõžž lie Hettast di Karesâvvnest.
Čeʹvetjäuʹrrneeʹǩǩ miõlâst leäi tuõđi miârkteei, što museost lie jååttam uuʹccab paaiʹǩin še.
– Oi leäi tuõđi šiõǥǥ, ko pueʹtte tiiʹǩ. Tän räjja ko pueʹtte čuäʹjted miʹjjid snimldõõǥǥid da täʹvvrid, rämmaš Nykänen.
Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.
