eruni

Walon (Rifondou)

(Addjectif) On clå eruni planté dins on piket  d’ bos.

Etimolodjeye

Bodje « rune », avou l’ betchete « e- » des viebes (divni del rune).

Viebe

eruni (4^inme troke) (codjowaedje)

(v. sins coplemint) si covri d’ rune, tot cåzant d’ ene sacwè d’ fier.
- I leyèt eruni leus usteyes.
- Po-z espaitchî l’ fier et l’ acî do-z eruni, les fåt pinturer avou del tchôde tourbantene, k’ on-z a fwait fonde del soûfe didins. — Ramexhné pa Lucien Léonard (fråze rifondowe).
(viebe å coplemint) ocsider (do fier).
- L’ aiwe et l’ mateur erunixhèt l’ fier.
- C’ est l’ crouwin del cåve k’ a-st eruni vosse bele hepe.
(viebe å prono) si covri d' erunixheure.
- Vola l'iviér vinou : so lès téres disseûlêyes,
  pus rin, ni djins ni bièsses.
  Lès r'lûhantès-èréres, rètrôk'lêyes è tchèri,
  s'arènihèt dèdja,
  èt l' bisteû, tot foû d' lu dè vèy qu'on l' mèt′ è sère,
  beûrlêye divins lès stås. — Henri Simon, Li pan dè bon Diu, Li sûrdèdje.
(viebe å prono) (imådjreçmint) divni setch.
- Tchanter sins boere, måy nouk nel frè,
  Tos les gozîs s' erunixhèt,
  I fåt k' on ramouye li bouket ! — Jean Dessard, D'ine cohe so l'aute, 1939, p.179, Tchantchès (1938) (fråze rifondowe).

Parintaedje

Mots vijhéns

(sinse 1)

Contråve

(sinse 2) disruni

Ortografeyes

Divant 1900 :

ereni : E177a ^(lére)
areni : E177a ^(lére)

Après 1900, foû rfondou (Feller, Feller ricandjî, nén Feller) :

E rfondou walon :

eruni : R9 ^(lére), R10 ^(lére), R13

Ôtès ortografeyes (avou des sourdants nén rkinoxhous) :

èruni : FE21

Ratournaedjes

si covri d’ rune

Francès : (se) rouiller ^(fr)

ocsider

Francès : oxyder ^(fr)

Addjectif

	singulî	pluriyal
omrin	eruni	erunis
femrin padrî	eruneye	eruneyes
femrin padvant	eruneye	eruneyès

eruni omrin

covrou di rune.
- Li coutea est eruni.
- Li stouve est tote eruneye.
- Ene viye fotche tote eruneye.
- L' ouxh sipiyeye si ratneut a ene tchårnire ki wignive les djoûs d' oraedje, et l' coronisse, magnî do tins, shonnéve, mågré les arondes k' el håbitént, li låme d' ene eruneye espêye. — Joseph Mignolet, Vè l' loumîre, 1922, p.5 (fråze rifondowe).
- Les anêyes sins guere — ça n’ arivéve nén sovint — l’ eraire disteréve des såbes erunis, et les noers oxheas des Otrichyins et des Espagnols, des Francès et des Bavirwès, des Borguignons et minme des Daenwès. — Lorint Hendschel.
- Dji su-st-one pitite gâre
  Qui a dès-idées noires
  Tot-èrunîye come on vî clau
  Dj’aveu on chèf di gâre
  — Émile Hesbois.
taetchî avou del rune.
- Vos avoz vosse tchimijhe eruneye.
ki n’ sait pus bén fé passer l’ vwès, tot djåzant do gozî cwand on-z a l’ rôguea.
- Dj’ a l’ gozî tot eruni.
coleur di rune.
- Les åbes ont pierdou leus fouytaedjes
  K' on rtrouve, håre et hote, erunis ;
  Et l' vî crucifi do vijhnaedje,
  Tot nos rloucant, nos shonne djemi. — Jean Dessard, D'ine cohe so l'aute, 1939, p.43, Vochal l’ivièr (1900) (fråze rifondowe).

Ratourneures

elle a toumé so on clå eruni : dijhêye, po s’ fote, d’ ene kimere ki ratind famile et ki n’ est nén marieye : elle est gonflêye come si ele s’ åreut yeu atrapé avou on vî clå.

Ortografeyes

Après 1900, foû rfondou (Feller, Feller ricandjî, nén Feller) :

E rfondou walon :

eruni : R10 ^(lére)

Ôtès ortografeyes (avou des sourdants nén rkinoxhous) :

eruni : R12

Ratournaedjes

covrou di rune

Francès : rouillé ^(fr)

taetchî avou del rune

Francès : taché de rouille

ki n’ sait pus bén fé passer l’ vwès

Francès : irrité ^(fr)

elle a toumé so on clå eruni

Francès : elle est tombée enceinte ^(fr)

Sustantif

singulî	pluriyal
eruni	erunis

eruni omrin

erunixhaedje.
- Ça serè målåjhey di raveur les taetches d’ eruni.

Ratournaedjes

elle a toumé so on clå eruni

Francès : rouille ^(fr)