Thor Gjermund Eriksen var kringkastingssjef frå 2013 til 2022.
Thor Gjermund Eriksen er ein norsk redaktør og medieleiar, som òg har bakgrunn som bedriftsleiar. Eriksen var kringkastingssjef i NRK frå 2013 til 2022, administrerande direktør i Norsk Tipping frå 2022 til 2023 og konsernsjef i Bane NOR frå 2023 til 2025.
Tidlegare var han journalist og redaktør i Dagbladet og konserndirektør i Amedia AS (tidlegare A-pressa).
Eriksen studerte jus ved Universitet i Oslo (1988–1989) og tok eksamen i sosiologi grunnfag i 1993. Han tok eksamen i bedriftsøkonomi ved Handelshøyskolen BI i 1995.
Samtidig med studiane hadde Eriksen fleire politiske verv for SV. Han var sekretær for SVs stortingsgruppe frå 1989 til 1991, og var SVs byrådssekretær for miljø og samferdsle i Oslo frå 1992 til 1995.
Thor Gjermund Eriksen
Eriksen var tilsett i Dagbladet frå 1995 til 2006, berre avbrote av eitt år i Aftenposten (2000–2001), der han var leiar for politisk avdeling. I Dagbladet var han reporter, klubbleiar, redaksjonssjef og politisk redaktør, og frå 2003 til 2006 var han sjefredaktør.
I 2006 blei Thor Gjermund Eriksen tilsett i Amedia AS. Frå 2008 var han konserndirektør og frå 2010 til 2013 konsernsjef.
Eriksen tiltredde som kringkastingssjef i 2013. Han fekk åremålet sitt fornya med seks år i 2019. Men hausten 2021 kunngjorde han at han ønskte å gå av i 2022.
I Thor Gjermund Eriksens periode som kringkastingssjef gjekk statskanalen gjennom store endringar både i struktur, organisasjon og programverksemd. Ordninga med kringkastingslisens blei avvikla i 2019, og NRK blei finansiert direkte over statsbudsjettet frå 2020. I Eriksens tid som NRK-sjef har endringar i organisasjonen resultert i om lag 600 færre stillingar enn då han tiltredde. I denne perioden er også talet på distriktskontor redusert.
Etter at NRK har hatt hovudverksemda si på Marienlyst sidan 1950, var Thor Gjermund Eriksen ein sentral pådrivar då NRK i 2021 vedtok å flytta verksemda til Ensjø.
Programprofilen i NRK blei betydeleg endra i Eriksens tid som kringkastingssjef. Det gjeld både radio og fjernsyn. Den løpande nyheitsdekninga fekk breiare plass. Samstundes mista NRK i denne perioden rettar til å senda viktige sportsevenement live. Det gjeld både fotball og vinteridrettar.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.