Marta Norheim

Marta Norheim er fødd på Voss i Hordaland (no Vestland). Ho tok examen artium ved Voss gymnas i 1974 og hovudfag i nordisk ved Universitetet i Oslo i 1984, med hovudoppgåva «Diktarkrise – krisedikting. Forfattarrolle i og utanfor bøkene Myten om Wu Tao-tzu av Sven Lindqvist og Herr Gustafsson själv av Lars Gustafsson».

Norheim har sidan 1987 vore tilsett i NRK. Ho har arbeidd med kulturstoff i radio og TV, i program som Kulturoperatørene og Askeladden. Etter kvart har ho spesialisert seg innanfor litteraturfeltet i programma Kritikartorget, Boktilsynet, Bok i P2 og P2-lyttarane sin romanpris.

Norheim gav i 2007 ut boka Røff guide til samtidslitteraturen. Her kombinerer ho nærlesing av einskildtekstar med stort oversyn over trendar og tendensar i det skjønnlitterære feltet i Noreg, representert ved forfattarar som debuterte mellom 1990 og 2005. Forma er engasjert og prega av journalistiske spissformuleringar, når Norheim til dømes kallar samtidstrendar for «Kunsten å overleva barndommen», «Kva er ein mann?» eller «Dirty re(gion)alism». I 2017 kom "oppfølgjaren" Oppdateringar frå lykkelandet: røff guide til samtidslitteraturen, som granskar bøker av forfattarar som debuterte etter 2005.

I 2002 vart Norheim tildelt den prestisjetunge kritikarprisen i kategorien Årets kritikar, og i 2009 fekk ho Olav Dalgards kritikarpris. I 2012 fekk ho Språkprisen for essaysamlinga Friksjonar, og i 2014 fekk ho Kringkastingsprisen.

• Noregs litteraturhistorie
• litteraturkritikk
• litteraturvitskap
• NRK

• Det Norske Samlaget si forfattarside om Marta Norheim