Bluestockings Society – Store norske leksikon

I 1779 fekk kunstnaren Richard Samuel (aktiv 1770–1786) stilt ut eit portrett på the Royal Academy i London, der dei ni fremste kvinnene i Bluestockings Society er representerte som dei ni musene i gresk mytologi.

I midten er Elizabeth Sheridan (tidlegare Linley), ho er songar og spelar på ei lyre. Til venstre sit kunstnaren Angelica Kauffman med ein palett ved eit staffeli, og bak henne står forfattarane Elizabeth Carter og Anna Barbauld. Til høgre (ståande) er forfattaren og filantropen Hannah More som held ei amfora – truleg eit symbol på musa for heilag poesi. Ved sida av More står Charlotte Lennox, ein skotsk litterær og kulturell kritikar, mest kjend for verket *The Female Quixote* (1752). Sittande er historikaren Catherine McCauley som held eit pergament, og ved sida av henne er Elizabeth Montagu med ei krone på hovudet – noko som peikar på rolla hennar som «Queen of the Blues». Den siste musa, ved sida av Montagu, er dramatikaren og romanforfattaren Elizabeth Griffith.

Musene i Apollons tempel (1778)

Av Richard Samuel.

Lisens: Falle i det fri (Public domain)

Latterleggjerande karikaturteikning av kvinnene i Bluestockings Society, ca. 1815.

«Breaking up of the Blue Stocking Club»

Av Thomas Rowlandson.

Lisens: Falle i det fri (Public domain)

Bluestockings Society var eit intellektuelt salongmiljø i England, som oppstod på midten av 1700-talet. Dette var ei gruppe som hovudsakeleg bestod av kvinner som samla seg for å delta i litterære og filosofiske diskusjonar. Føremålet var å fremje skriving og utdanning blant kvinner. Den fyrste generasjonen av The Bluestockings Society vart leia av Elizabeth Montagu (1718-1800), seinare også kjend under kallenamnet «Queen of the Blues».

Faktaboks

Etymologi: engelsk 'blåstrømpe-samfunnet'
Også kjend som: Blue Stockings Society; Blue Stocking Club; Bluestocking Circle

Tydinga av «bluestocking»

Opphavet til omgrepet «Bluestocking» er uklart og kanskje litt underleg, men det ser ut til at Benjamin Stillingfleet, botanikar og multikunstnar, vart erta for å ha kome til eitt av møta med kvardagslege blå ullstrømper i staden for elegante silkestrømper. Utsagnet «kom i dei blå strømpene dine» vart etter kvart eit fast uttrykk som tydde at samlingane skulle vere uformelle og intime, heller enn store og høgtidlege.

Det er ironisk at omgrepet «bluestocking», på norsk «blåstrømpe», seinare vart brukt om intellektuelle kvinner på ein nedsetjande måte.

Kvinnene i Bluestockings Society

Bluestockings Society samla nokre av dei mest innflytelsesrike kvinnene i 1700-talets Storbritannia, og desse bidrog til å forme samtidas intellektuelle og kulturelle landskap.

I 1779 fekk kunstnaren Richard Samuel (aktiv 1770–1786) stilt ut eit portrett på the Royal Academy i London, der dei ni fremste kvinnene i Bluestockings Society, mellom andre Anna Barbauld, Hannah More og Charlotte Lennox, er representerte som dei ni musene i gresk mytologi.

Det var også rom for menn i salongen, og nokre av dei faste medlemmene var Samuel Johnson, Joshua Reynolds, David Garrick, og Edmund Burke.

Møteplass

I mange år vart salongane haldne i huset til Elizabeth Montagu i Hill Street, London, men etter at mannen hennar, Edward Montagu, døydde i 1775, bygde ho seg eit stort hus i Portman Square, og dette vart no salongens faste møteplass. Fyrst i 1799, då ho var åttiein år gammal, gav Elizabeth Montagu seg med å arrangere salongsamlingar.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

Vi manglar fagansvarleg for Internasjonal kvinnebevegelse

Vil du bli fagansvarleg? Ta kontakt